Ka përfunduar në orën 20:00 procesi i votimit për zgjedhjet e jashtëzakonshme parlamentare në Serbi, ku qytetarët u thirrën për të zgjedhur 250 deputetët e përbërjes së re të Parlamentit.

Qendrat e votimit u hapën në orën 07:00 të mëngjesit dhe u mbyllën në orën 20:00. Sipas rregullave zgjedhore, qytetarët që ndodheshin brenda qendrave të votimit ose në radhë përpara tyre në momentin e mbylljes kanë të drejtë të votojnë.

Sipas të dhënave të publikuara nga Komisioni Republikan Zgjedhor (REC), pjesëmarrja deri në orën 18:00 kishte arritur në 64.89 për qind.

Në këto zgjedhje kishin të drejtë vote gjithsej 6,451,292 qytetarë, ndërsa procesi u organizua në 8,392 qendra votimi, prej të cilave 93 ndodheshin jashtë territorit të Serbisë.

Në garën elektorale morën pjesë 18 lista zgjedhore, me gjithsej 2,418 kandidatë për deputetë. Nëntë prej këtyre listave përfaqësonin pakicat kombëtare.

Heshtja zgjedhore, e cila ishte në fuqi gjatë procesit elektoral, përfundoi zyrtarisht me mbylljen e qendrave të votimit në orën 20:00.

Zgjedhjet e kësaj të diele u shoqëruan edhe me raportime për incidente të dhunshme në disa qendra votimi, çka solli reagimin e Bashkimit Evropian, i cili u bëri thirrje të gjitha palëve të ruajnë qetësinë dhe të shmangin provokimet.

Pas mbylljes së votimit, pritet nisja e numërimit të votave dhe publikimi i rezultateve të para të zgjedhjeve parlamentare.