Koalicioni ushtarak i udhëhequr nga Arabia Saudite ka njoftuar se ka rrëzuar një dron, i cili sipas tij ishte nisur nga rebelët Houthi në Jemen dhe kishte si objektiv rajonin e Mekës.

Sipas zëdhënësit të koalicionit, droni u kap dhe u shkatërrua në ajër përpara se të arrinte objektivin e pretenduar.

Megjithatë, nga ana tjetër, rebelët Houthi kanë mohuar çdo përfshirje në këtë incident. Zëdhënësi i tyre, Yahya Saree, deklaroi se grupi nuk kishte kryer asnjë sulm ndaj territorit saudit gjatë ditës së premte, duke i cilësuar pretendimet e Riadit si një “gënjeshtër të madhe dhe të rëndë”.

Ky zhvillim vjen pas një tjetër njoftimi nga koalicioni saudit, i cili pretendoi se kishte interceptuar dhe shkatërruar edhe një raketë të lëshuar nga Houthit, me drejtim pjesën perëndimore të Arabisë Saudite.

Tensionet mes palëve vijojnë të jenë të larta, ndërsa të dyja kanë raportuar për sulme dhe operacione ushtarake gjatë ditëve të fundit.

Arabia Saudite është e përfshirë në konfliktin e Jemenit që prej marsit të vitit 2015, kur ndërhyri ushtarakisht në mbështetje të qeverisë së njohur ndërkombëtarisht. Konflikti nisi të përshkallëzohej pasi rebelët Houthi morën kontrollin e kryeqytetit Sana në shtator të vitit 2014.

Deri më tani, pretendimet për sulmin ndaj rajonit të Mekës janë kundërshtuar.