Një basketbollist profesionist nga Shtetet e Bashkuara të Amerikës është arrestuar në Nigeri, pasi iu gjetën rreth 34 kilogramë kanabis në valixhet e tij në aeroportin kryesor të Lagos. Bëhet fjalë për Greene Da’monte Khiree, 28 vjeç, nga shteti i Xhorxhias, i cili kishte mbërritur në Nigeri nga Tajlanda, përmes Emirateve të Bashkuara Arabe.

Sipas Agjencisë Kombëtare për Luftën kundër Drogave në Nigeri (NDLEA), basketbollisti u arrestua të mërkurën, pasi punonjësit e aeroportit vunë re se ai kishte braktisur dy valixhet e regjistruara në emrin e tij dhe po përpiqej të largohej vetëm me bagazhin e dorës.

Gjatë kontrollit, në dy valixhet u zbuluan 32 pako me një lloj kanabisi të njohur si “Loud”, një variant me përqendrim të lartë të substancës narkotike. Sasia totale e sekuestruar ishte 33.95 kilogramë. Autoritetet bënë të ditur se në bagazhe u gjet edhe një pajisje gjurmuese.

Gjatë marrjes në pyetje, 28-vjeçari deklaroi se kishte luajtur basketboll profesionist në Tajlandë dhe se kishte udhëtuar drejt Nigerisë për të krijuar kontakte dhe zgjeruar rrjetin e njohjeve në funksion të karrierës së tij sportive. Megjithatë, sipas autoriteteve, kontrolli i telefonit të tij zbuloi të dhëna që tregonin dijeninë dhe përfshirjen e mundshme në trafikun e drogës.

Basketbollisti nuk ka bërë ende një reagim publik lidhur me akuzat. Ndërkohë, Federata Ndërkombëtare e Basketbollit (FIBA) regjistron një lojtar me emrin Damonte Greene, paraqitja e fundit e të cilit në databazën e federatës rezulton në turneun Phuket Elite Cup në Tajlandë, më 26 shtator.

Nigeri, e konsideruar për një kohë të gjatë kryesisht si vend tranzit për trafikun e drogës, vitet e fundit është kthyer gjithnjë e më shumë edhe në një qendër prodhimi dhe shpërndarjeje të lëndëve narkotike. Sipas Kombeve të Bashkuara, në vend është rritur prodhimi dhe konsumi i drogave të paligjshme.

Operacionet e fundit të autoriteteve kanë zbuluar disa laboratorë të mëdhenj të prodhimit të metamfetaminës, ndërsa hetuesit po shqyrtojnë edhe lidhjet e mundshme mes prodhuesve nigerianë dhe karteleve meksikane të drogës.

Në shtator, autoritetet njoftuan shkatërrimin e një laboratori metamfetamine dhe arrestimin e një shtetasi meksikan, të dyshuar si drejtues i një rrjeti narkotrafiku, i cili dyshohej se po përpiqej të largohej nga Nigeria përmes aeroportit të Lagos.

Ndërsa në gusht, një influencues i rrjeteve sociale, i dyshuar për lidhje me një rrjet ndërkombëtar të trafikut të drogës, u arrestua pasi autoritetet sekuestruan kokainë me vlerë rreth 28 milionë dollarë, e cila dyshohej se kishte si destinacion Mbretërinë e Bashkuar.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb