Shqiptarët nëpër Evropë po tregohen të suksesshëm thuajse në të gjitha aspektet e jetës.
Sa i përket futbollit, Xherdan Shaqiri padyshim që mund të merret shembull nga të rinjtë për suksesin e tij fillimisht me Baselin pastaj edhe me Bayernin ku arriti kulmin duke fituar trofeun më të çmueshëm për klube, Ligën e Kampionëve.
Por një tjetër talent si Shaqiri ka filluar furishëm me suksese në Zvicër, vendi i mundësive për shqiptarët.
Ari Shaqiri, është vëllai i madh i Xherdanit i cili ka filluar të merret me fëmijë dhe ka hapur një akademi të futbollit që e quan ‘Prio Soccer’, që në shqip do të thotë ‘Prioritet futbolli’.
Akademia është hapur tre muaj më parë dhe deri më tani po ka mjaft sukses, pasi në të janë mbi 50 futbollistë. Në një prononcim për Telegrafin, krijuesi i akademisë ‘Prio Soccer’, Ari Shaqiri tregon për përvojën e tij në këtë drejtim.
“Është një projekt shumë i madh dhe ka filluar me mjaftë sukses në Zvicër fillimisht. Ka tre muaj që është hapur akademia dhe deri më tani kemi mbi 50 futbollistë të regjistruar”, shprehet Ari Shaqiri për Telegrafin.
Në këtë akademi ka futbollistë të talentuar nga të gjitha shtetet, por një numër i madh është edhe i shqiptarëve.
Ari tregon se ka shumë talent në këtë akademi dhe beson se një ditë këta futbollistë të rinj mund të bartin fanellën e ndonjë skuadre të madhe evropiane.
“Ka shumë futbollistë të talentuar edhe nga Kosova dhe Shqipëria kemi nxënës të cilët premtojnë shumë për të ardhmen”, deklaroi Shaqiri.
Përpos Ari Shaqirit, në këtë akademi janë edhe disa trajnerë profesionist të cilët më parë kanë luajtur edhe për Përfaqësuesen e Zvicrës e skuadra të mëdha zvicerane si Grasshopper apo Zurich.
Stefan Kohler është trajneri kryesor në akademi që më parë ka qenë i rregullt tek Përfaqësuesja e Zvicrës nga mosha U15 deri në U21, ndërsa pas tij vijnë edhe Simon Dunk ish futbollist i Baselit, Kimran Kurtish dhe Fabio Welbers.
Shaqiri ka në plan që këtë akademi ta sjellë edhe në Kosovë për t’i ndihmuar fëmijët kosovarë të tregojnë talentin dhe t’i dërgojë në skuadrat e mëdha evropiane.
“Qëllimi është që këtë akademi ta hap edhe në Kosovë. Jemi duke shqyrtuar mundësinë se në cilin qytet ta hapim. Ne synojmë që t’i ndihmojmë fëmijët kosovarë dhe në momentin që do të hapet akademia atëherë do të angazhojmë trajnerë vendorë do të sjellim edhe profesionist nga Zvicra”, deklaroi Shaqiri.
(d.d/BalkanWeb)
