TIRANE- Aleanca LGBT dhe Pro LGBT, komuniteti i Lesbikeve, Gay, Biseksualëve dhe Transeksualëve kanë nisur sot rreth orës 10:00 paradën me biçikleta, pavarësisht se pak orë më vonë opozita kishte njoftuar mbajtjen e një proteste në Bulevardin “Dëshmorët e Kombit”.
Parada nisi nga Pallati i Kongreseve, ndërsa pjesëmarrësit pedaluan në bulevard dhe u kthyen majtas në rrugën “Ismail Qemali”, për t’u futur në zonën e ish-Bllokut, tek rruga “Ibrahim Rugova” dhe ashtu siç ishte parashikuar vijoi përgjatë lumit të Lanës, tek ura në shkollën “Vasil Shanto” dhe mandej përsëri përgjatë Lanës.
Më herët, aktivistët LGBTI kishin marrë garancinë direkte nga kryetari i Partisë Demokratike, Lulzim Basha se nga ana e mbështetësve të opozitës nuk do të kishte asnjë incident apo kërcënim për mbarëvajtjen e sigurt të këtij aktiviteti.
Në këtë paradë morën pjesë aktivistë LGBTI nga i gjithë rajoni, mbështetës, aktivistë dhe pjesëtarë të komunitetit LGBTI nga Shqipëria, si dhe përfaqësues të trupit diplomatik në Shqipëri. Policia kishte marrë masa për sigurimin e paradës së komunitetit LGBT, duke shmangur kalimin para çadrës para kryeministrisë.
(m.a/BalkanWeb)
