TIRANË- Pas bashkimit me koalicionin e majtë të maxhorancës, Kreu i Partisë Demokristiane, Nard Ndoka ka deklaruar sot se do të bëjë publik “divorcin” me PD-në, i cili sipas tij erdhi për shkak të mungesës së seriozitetit të kësaj të fundit.
Ndoka ka thënë se PDK-ja nuk ka pasur kërkesa ultimative por frymë bashkëpunimi dhe se kishin rënë dakord me PD-në për bashki e kandidatë të veçantë, por më pas ai thotë se PD i zhbëri këto vendime.
“Do bëj publik divorcin me PD-në. Kemi qenë korrekt, nuk kemi pasur kërkesa. Nuk kemi pasur kërkesa ultimative por frymë bashkëpunimi. Nga ana e PD-së ka patur mungesë të theksuar serioziteti. Ne kishim rënë dakord për bashki e kandidatë të veçantë pas 24 orësh PD i zhbëri këto vendime”, tha Ndoka.
Dje ai tha pas mbledhjes së kryesisë, se PD i ka mbyllur të gjitha dyert e bashkëpunimit, ndaj dhe kalimi në koalicionin qeverisës sipas tij ishte i detyrueshëm.
(m.k/BalkanWeb)
