TIRANE- Edukimi fizik dhe aktivitetet sportive për nxënësit në shkolla, janë dy veprimtari të ndryshme, por të lidhura ngushtë me njëra-tjetrën sa i përket orientimit të të rinjve drejt sportit.
Për Sekretarin e Përgjithshëm të Federatës Shqiptare të Sportit në Shkolla, Arben Becolli, ka një interes në rritje të të rinjve që duan të vazhdojnë të merren me sportet.
I ftuar në emisionin “Intervista e Ditës” me Erjon Çikun, Sekretari i Përgjithshëm Becolli thekson se që në shkolla, nxënësit marrin edukimin fizik që synon orientimin e tyre drejt aktiviteteve sportive.
Sipas Becollit, kurrikula aktuale, me nga tre orë edukim fizik në javë është e mjaftueshme për t’u dhënë nxënësve hapat e parë të orientimit të tyre drejt sporteve. Por shton se kjo se sa i përket rëndësisë që ka sporti në jetën e gjithësecilit, ende nuk është e mjaftueshme.
Më tej Becolli thotë se ky interes në rritje i nxënësve vihet re edhe në shkollat nëpër rrethe, ku pavarësisht mangësisë në infrastrukturë, të rinjtë po zgjedhin gjithnjë e më tepër sportin për të ardhmen e tyre.
(BalkanWeb)
