TIRANE- Deputeti i Partisë Demokratike Tritan Shehu i ka bërë thirrje qeverisë që të anulojë procesin për testimin e infermierëve. Duke e cilësuar këtë një “mjet seleksionimi arbitrar e presioni mbi personelin shëndetësor”, deputeti Shehu në një deklaratë për mediat tha se ky proces duhet të ndërpritet, pasi duhet pritur opinioni i Gjykatës së Lartë ndaj ankesës së Urdhrit të Infermierëve për këtë iniciativë.
Sipas Shehut, “Ministria e Shëndetësisë me një komunikim aspak transparent urdhëron drejtoritë e institucioneve shëndetësore që në periudhën 24 korrik- 2 gusht të kryejnë “testimin” e infermierëve të vendit. Sipas urdhrit në fjalë ky testim do të fillojë me 24 korrik me infermieret e spitaleve obstetrike-gjinekologjike të Tiranës dhe atij “Shefqet Ndroqi””.

JA DEKLARATA E PLOTE
Për habinë e të gjithëve i ashtuquajturi “testim”, i iniciuar si një mjet seleksionimi arbitrar e presioni mbi personelin shëndetësor, u rishfaq përsëri.

Ministria e Shëndetësisë me një komunikim aspak transparent urdhëron drejtoritë e institucioneve shëndetësore që në periudhën 24 korrik- 2 gusht të kryejnë “testimin” e infermierëve të vendit.

Sipas urdhrit në fjalë ky testim do të fillojë me 24 korrik me infermieret e spitaleve obstetrike-gjinekologjike të Tiranës dhe atij “Shefqet Ndroqi”.

Në tërësi në të gjithë këto veprime është mbajtur një regjim fshehtësie i plotë.

Urdhri i Infermiereve, shërbimet universitare, fakultetet përkatëse, etj; nuk kanë asnjë njoftim dhe nuk kanë marrë pjesë në përgatitjen përkatëse.

Nuk është bërë publik asnjë dokument shpjegues, platformë a pyetësor.

Ky proces kërkohet të realizohet pa pritur opinionin e Gjykatës së Lartë ndaj ankesës së Urdhrit të Infermierëve për këtë iniciativë.

Dhe për me tepër, e gjithë kjo kërkon të kryhet pikërisht në këtë periudhë kulminante pushimesh, pra jashtë vëmendjes së opinionit publik mjekësor !

Nga ana tjetër, kjo iniciativë po përsëritet në mënyrë krejt të njëanshme, në një kohë kur në Komisionin Parlamentar e Kuvend dominoi vullneti i përbashkët për ndryshimet e ligjit të edukimit të vazhduar.

Kështu, tashmë në këtë ligj përfshihet i gjithë personeli shëndetësor, pra dhe infermieret.

Në këtë mënyrë, ky vendim bie ndesh edhe me këto ndryshime ligjore, qe do të hyjnë ne fuqi mbas pak ditësh, pavarësisht vendimit të kaluar të “Gjykatës Administrative”.

Në këto kushte ne kërkojmë anulimin e këtij “testimi”, pritjen e hyrjes në fuqi të ndryshimeve të fundit ligjore, si dhe përcaktimin më tej të një procedure të qartë e të plotë për edukimin e vazhdueshëm të infermiereve, në baze të së cilës duhet te procedohet.

(b.e/balkanWeb)