Vetëm 48 orë pasi forcat amerikane kapën Nicolás Maduron dhe bashkëshorten e tij, Cilia Flores, nga një kompleks në Karakas, ish-udhëheqësi venezuelian u paraqit të hënën para një gjykate federale në Nju Jork, ku u deklarua i pafajshëm për akuzat për konspiracion dhe trafik droge të ngritura nga qeveria amerikane.
Rasti po trajtohet nga drejtësia amerikane si një çështje penale e zakonshme, pavarësisht natyrës së pazakontë të operacionit ushtarak që çoi në arrestimin e një kreu shteti. Prokurorët amerikanë pretendojnë se Maduro, anëtarë të familjes së tij dhe bashkëpunëtorë të afërt kanë qenë të përfshirë për dekada në një rrjet të gjerë trafikimi kokaine, në bashkëpunim me organizata të shpallura terroriste.
Sipas aktakuzës prej 25 faqesh, Maduro, gruaja e tij, djali Nicolás Ernesto Maduro Guerra dhe disa zyrtarë të lartë venezuelianë akuzohen se kanë “abuzuar me pushtetin publik dhe kanë korruptuar institucionet shtetërore” për të lehtësuar importimin e sasive të mëdha të kokainës në Shtetet e Bashkuara.
Në seancën e parë gjyqësore, avokati i Maduros argumentoi se klienti i tij duhet të gëzojë imunitet si udhëheqës i një shteti sovran dhe se kapja e tij nga SHBA përbën një akt të paligjshëm ndërkombëtar. Teksa po largohej nga salla e gjyqit, Maduro e quajti veten një “president të rrëmbyer” dhe një “të burgosur lufte”.
Edhe bashkëshortja e tij, Cilia Flores, u deklarua e pafajshme. Avokati i saj, Mark E. Donnelly, tha se mbrojtja është e gatshme të shqyrtojë dhe të sfidojë provat e paraqitura nga prokuroria.
Në aktakuzë përfshihen gjithashtu figura të njohura të establishmentit venezuelian, përfshirë ministrat aktualë dhe ish-ministrat e Brendshëm Diosdado Cabello Rondón dhe Ramón Rodríguez Chacín, si dhe një drejtues i dyshuar i bandës kriminale Tren de Aragua. SHBA-të kanë shpallur shpërblime për informacion që çon në arrestimin e disa prej tyre.
Prokurorët pretendojnë se të akuzuarit kanë bashkëpunuar me grupe si FARC, kartelet Sinaloa dhe Zetas, si dhe Tren de Aragua – të gjitha të shpallura organizata terroriste nga qeveria amerikane në shkurt 2025. Sipas dosjes, rrjeti ka siguruar mbulim shtetëror, mbështetje logjistike dhe mbrojtje ligjore për dërgesat e drogës që kalonin përmes Venezuelës drejt SHBA-së.
Djali i Maduros, Nicolás Maduro Guerra, akuzohet se ka luajtur një rol aktiv në transportimin e sasive të mëdha të kokainës dhe në koordinimin e dërgesave drejt Miami-t dhe Nju Jorkut.
Ekspertë ligjorë kanë ngritur pikëpyetje mbi ligjshmërinë ndërkombëtare të operacionit amerikan, duke sugjeruar se ai mund të ketë shkelur Kartën e OKB-së. Megjithatë, sipas juristëve amerikanë, fakti që Maduro ndodhet tashmë në SHBA e bën të ligjshëm gjykimin e tij sipas ligjit të brendshëm amerikan.
Gjyqtari federal Alvin Hellerstein ka caktuar seancën e radhës për më 17 mars. Prokuroria ka kërkuar gjithashtu konfiskimin e pasurive dhe fondeve të të pandehurve.
