Aeroportet në Danimarkë dhe Norvegji janë detyruar të mbyllen pas raportimeve për dronë në hapësirën e tyre ajrore ditët e fundit.

Incidentet janë pjesë e asaj që disa zyrtarë evropianë e shohin si një model të ndërprerjeve ruse që ka ekspozuar cenueshmërinë e hapësirës ajrore evropiane në një kohë tensionesh të larta midis Moskës dhe NATO-s.

Por Kremlini ka mohuar fuqimisht çdo përfshirje.

Çfarë ka ndodhur?

Në Danimarkë, aeroporti civilo-ushtarak i Aalborgut u mbyll gjatë natës nga e mërkura deri të enjten dhe aeroplanët u ulën në tokë.

Policia daneze tha se dronët ndoqën një model të ngjashëm me ato që shkaktuan mbylljen e aeroportit të Kopenhagenit disa ditë më parë .

Policia tha se dronë ishin vërejtur gjithashtu pranë aeroporteve në qytetet daneze Esbjerg, Sonderborg dhe Skrydstrup – ku ndodhet baza e flotës daneze të avionëve luftarakë F-16 dhe F-35.

Në Norvegji, autoritetet u detyruan të ndalonin fluturimet në aeroportin e Oslos për tre orë të hënën, pasi u pa një dron.

Ende nuk është vërtetuar një lidhje midis incidenteve norvegjeze dhe daneze.

Kjo vjen pas raportimeve për dronë rusë që kanë shkelur hapësirën ajrore të Polonisë dhe Rumanisë, duke nxitur biseda mbi Nenin 4 brenda NATO-s .

Pse është e rrezikshme?

Ministri danez i drejtësisë, Peter Hummelgaard, tha të enjten se qëllimi i dronëve ishte të “mbjellnin frikë dhe përçarje”.

Kur dronët fluturojnë mbi aeroporte, ato paraqesin rrezik për t’u përplasur me aeroplanët, veçanërisht gjatë ngritjes ose uljes.

Në vitin 2018, studiuesit në Institutin e Kërkimeve të Universitetit të Daytonit publikuan pamje video që tregonin se çfarë mund të ndodhë kur një dron i vogël godet krahun e një avioni.

Ekipi imitoi një përplasje midis një avioni pa pilot dhe një avioni të vogël Mooney M20 me shpejtësi 328 km/orë.

Pamjet filmike tregonin dronin duke hapur një vrimë në krah .

A duhet të mbyllen aeroportet plotësisht?

Jo, aeroportet nuk janë të detyruara të zbatojnë një mbyllje të plotë kur zbulohet një dron, por është tipike të ndalohet trafiku ajror brenda dhe jashtë hapësirës për të shmangur përplasjet.

Kjo ka efekte anësore për pasagjerët që udhëtojnë, duke shkaktuar vonesa dhe ridrejtim të fluturimeve diku tjetër.

Është pronari ose operatori i një aeroporti individual që vendos nëse do ta mbyllë objektin dhe për sa kohë do të ndalen aeroplanët.