Të paktën 4 persona, mes tyre një fëmijë dyvjeçar, u vranë kur një aeroplan i Marinës Meksikane që transportonte pacientë mjekësorë u rrëzua në ujërat e Gjirit të Galvestonit, Teksas, të hënën pasdite, thanë autoritetet amerikane.

Katër persona janë gjetur gjallë dhe një person është i zhdukur, thanë zyrtarë të Rojës Bregdetare të SHBA-së. Një zëdhënës i Rojës Bregdetare Houston-Galveston tha se operacioni i kërkim-shpëtimit me pjesëmarrjen e shumë agjencive është duke vazhduar.

Sherifi i Qarkut Galveston, Jimmy Fullen, tha se avioni po transportonte pacientë me djegie të rënda. Autoritetet lokale thanë se në bord kishte gjithsej tetë persona: katër anëtarë të ekuipazhit të Marinës Meksikane dhe katër civilë, një fakt i konfirmuar nga Marina Meksikane në një deklaratë zyrtare.

Midis pasagjerëve ishte të paktën një pacient i mitur me djegie, thanë zyrtarët e sherifit për mediat lokale. Edhe pse zyra e sherifit tha se katër persona kishin vdekur, Roja Bregdetare nuk ishte në gjendje të konfirmonte zyrtarisht një vdekje të katërt deri të hënën në mbrëmje.

Zhytësit, një njësi hetimi e vendit të ngjarjes, dronë dhe anije patrullimi u dërguan në vendngjarje, dhe përplasja u raportua për herë të parë në orën 3:17 pasdite sipas kohës lokale. Zyrtarë nga Departamenti i Sigurisë Publike i Teksasit, Administrata Federale e Aviacionit (FAA) dhe Bordi Kombëtar i Sigurisë së Transportit (NTSB) po marrin pjesë gjithashtu në hetim për të përcaktuar shkakun e përplasjes.

Rrethanat në të cilat u rrëzua avioni mbeten të paqarta, ndërsa autoritetet vazhdojnë hetimet e tyre si për pasagjerin e zhdukur ashtu edhe për rrethanat e aksidentit.