Kryetari i Grupit Parlamentar të Partisë Demokratike, Gazment Bardhi, ka reaguar ndaj deklaratave të Komisioneres së Zgjerimit të BE-së, Marta Kos, pas një interviste të saj në Politico.
Në një reagim publik, Bardhi e cilësoi të papranueshëm qëndrimin e komisioneres, duke theksuar se ajo ka bërë përgjegjëse shoqërinë shqiptare për korrupsionin në vend.
“Shoqëria shqiptare nuk e pranon korrupsionin, shqiptarët nuk janë të korruptuar,” u shpreh Bardhi, duke shtuar se përgjegjësia për korrupsionin është individuale dhe i takon kryeministrit Edi Rama.
Ai akuzoi Ramën për mbrojtjen e korrupsionit, duke përmendur rastin e zëvendëskryeministres Belinda Balluku, për të cilën tha se është mbrojtur politikisht nga mazhoranca në Kuvend.
Bardhi u ndal edhe te roli i drejtësisë, duke theksuar se SPAK nuk pengohet nga shoqëria shqiptare, por nga ndërhyrjet politike.
Në përfundim, ai i kërkoi institucioneve europiane të distancohen nga deklarata të tilla, duke i cilësuar si fyese dhe të papërshtatshme për një shoqëri që, sipas tij, mbetet ndër më proeuropianet në botë.
REAGIM I KRYETARIT TË GRUPIT PARLAMENTAR TË PD, GAZMENT BARDHI:
REAGIM I DETYRUAR!
I pabesueshëm qëndrimi i Komisioneres së Zgjerimit znj. Marta Kos, që është shpërndarë në median shqiptare në vijim të një interviste të saj në Politico, që bën bashkëpërgjegjës për korrupsionin e Edi Ramës shoqërinë shqiptare.
Jo e nderuar znj. Komisionere;
Shoqëria shqiptare nuk e pranon korrupsionin, shqiptarët nuk janë të korruptuar.
Përgjegjësia për korrupsionin dhe pranimin e mbrojtjen e tij është vetëm personale e Edi Ramës. Korrupsionin e Belinda Ballukut nuk e kanë pranuar shqiptarët, por e ka mbrojtur Edi Rama me deputetët – kartona në Kuvendin e Shqipërisë. SPAK nuk po e pengon shoqëria shqiptare të luftojë korrupsionin, por po e pengon Edi Rama që po ndërhynë në hetimet e një çështje konkrete.
Ju nuk keni asnjë të drejtë të fyeni shoqërinë shqiptare, që është populli më proeuropian në botë. Ne e përbuzim përgjithësimin dhe vlerësimin tuaj për shoqërinë shqiptare, dhe kërkojmë me këmbëngulje distancimin e institucioneve europiane mbi përgjithësime të tilla të papërshtashme për shqiptarët.
