Të paktën 26 persona kanë humbur jetën dhe pesë të tjerë janë plagosur pas një sulmi ajror rus ndaj një qendre ku shpërndahej ndihma humanitare në jug të Ukrainës. Sulmi ndodhi të hënën në fshatin Komyshuvakha, në rajonin e Zaporizhias, ku sipas autoriteteve ukrainase u hodhën të paktën nëntë bomba ajrore, me peshë rreth 3 tonë secila.

Presidenti ukrainas Volodymyr Zelensky e cilësoi sulmin si një akt të tmerrshëm, duke bërë të ditur se objektivi i parë ishte një shkollë lokale, e cila përdorej për nevoja humanitare. Pas goditjes së parë, sipas tij, forcat ruse sulmuan sërish zonën ku ishin strehuar njerëzit.

Bilanci i viktimave u rrit gjatë orëve në vijim. Shërbimi Shtetëror i Emergjencave në Ukrainë fillimisht konfirmoi 24 të vdekur, mes tyre dy shpëtues dhe katër efektivë policie, ndërsa më vonë Zelensky njoftoi se numri kishte arritur në 26. Fillimisht, 27 persona rezultonin të zhdukur.

Presidenti ukrainas deklaroi se Rusia e dinte se banorët e zonës merrnin çdo javë ndihma humanitare në atë qendër. Ai e cilësoi sulmin si një tjetër dëshmi se Moska nuk po kërkon uljen e tensioneve dhe akuzoi ushtrinë ruse se po dërgon sinjale të kundërta me përpjekjet për paqe.

Ndërkohë, ekipet e shpëtimit vijojnë kërkimet mes rrënojave, por operacioni është ndërprerë disa herë për shkak të sulmeve me dronë në zonë. Kreu i rajonit të Zaporizhias, Mykhailo Semikin, e cilësoi ngjarjen si një tragjedi të rëndë, duke paralajmëruar se persona të tjerë mund të ndodhen ende nën rrënoja.

Në të gjithë rajonin e Zaporizhias është shpallur ditë zie për të martën. Nga ana tjetër, ushtria ruse nuk ka bërë ende një reagim publik lidhur me sulmin.

Rusia nisi pushtimin në shkallë të plotë të Ukrainës në shkurt të vitit 2022.