Lajmi për vdekjen e Giorgio Armani-t u përhap shpejt në të gjithë botën, duke shkaktuar zi në botën e politikës, modës dhe argëtimit.

Donatella Versace, ndër të parat që komentoi për ndarjen nga jeta të stilistit, shkroi në Instagram se “bota ka humbur një gjigant sot. Ai bëri histori dhe do të mbahet mend përgjithmonë”.

Kryeministrja Giorgia Meloni gjithashtu shprehu ngushëllimet e saj, duke e kujtuar stilistin si “një ikonë dhe punëtor të palodhur, një simbol të më të mirës së Italisë” i cili “me elegancën, maturinë dhe kreativitetin e tij i solli prestigj modës italiane dhe frymëzoi të gjithë botën”.

Për Ministrin e Made in Italy, Adolfo Urso, “Giorgio Armani mishëroi elegancën italiane në një shkallë globale. Me një stil inovativ dhe dallues, kreativitet të rafinuar dhe një vizion të përjetshëm, ai e transformoi modën në një gjuhë universale cilësie, duke ndihmuar që Made in Italy të jetë një simbol i përsosmërisë globale.”

Dhe sipas Ministrit të Kulturës, Alessandro Giuli, bashkë me të “humbim një protagonist absolut të kulturës italiane, i cili dinte si ta transformonte elegancën në një gjuhë universale”.

Zëvendëskryeministri dhe kreu i Ligës, Matteo Salvini, e përshkroi Armanin si “një gjeni absolut, një përsosmëri italiane të njohur dhe të admiruar në të gjithë botën, një mjeshtër të pakrahasueshëm të stilit dhe kreativitetit: trashëgimia e tij do të vazhdojë të shkëlqejë në historinë dhe të ardhmen e Made in Italy”.

Ngushëllime erdhën edhe nga bota televizive: “Giorgio, ti je dhe gjithmonë do të jesh Mbreti ynë. Faleminderit që na bën të ndihemi krenarë që jemi italianë”, – shkroi Simona Ventura në rrjetet sociale.