Për shumë njerëz, festat nënkuptojnë një gjë: ushqim të shijshëm dhe shumë sasi.
Megjithatë, konsumi i tepërt mund të rrisë rrezikun e problemeve shëndetësore, veçanërisht mundësinë e atakut në zemër, i cili prek njerëzit me sëmundje të caktuara kronike në një masë më të madhe.
Sëmundjet e zemrës janë shkaku kryesor i vdekjes në Shtetet e Bashkuara dhe përafërsisht çdo 40 sekonda dikush pëson atak në zemër, vëren Ëashington Post.
Kjo korrespondon me më shumë se 800,000 njerëz çdo vit , sipas të dhënave nga Qendrat për Kontrollin dhe Parandalimin e Sëmundjeve (CDC).
“Nëse jeni i ri dhe i shëndetshëm dhe hani vetëm një vakt të madh, nuk ka gjasa të shkaktojë atak në zemër, por në grupe të caktuara të popullsisë, sigurisht që mund të rrisë rrezikun”, tha Ameya Kulkarni, një kardiologe në Kaiser Permanente.
Ushtrimet fizike, stresi dhe ushqimi
Një analizë e vitit 2005 e 17 studimeve sugjeroi që ushtrimet intensive fizike, të ngrënit dhe stresi emocional ishin ndër faktorët më të përmendur që çonin në atak në zemër.
Burrat kishin më shumë gjasa sesa gratë të raportonin aktivitet fizik dhe të ngrënit, ndërsa gratë kishin më shumë gjasa të raportonin stres emocional. Kjo ka kuptim. Ngrënia e një vakti të bollshëm me shumë yndyrna të ngopura, kalori dhe karbohidrate të rafinuara është e ngjashme me aktivitetin e tepërt fizik për zemrën tuaj.
Për të tretur atë sasi të madhe ushqimi në stomak, trupi juaj ridrejton rrjedhën e gjakut në sistemin tretës. Enët e gjakut gjithashtu ngushtohen, duke rritur presionin e gjakut dhe duke kufizuar rrjedhën e gjakut në zemër, sipas Steve Kopecky, MD, një kardiolog dhe profesor i mjekësisë dhe sëmundjeve kardiovaskulare në Klinikën Mayo.
Presioni i lartë i gjakut mund të shkaktojë këputjen e pllakave të kolesterolit në arterie, duke formuar një mpiksje.
Edhe vetë vakti me shumë yndyrë mund të rrisin mundësinë e një mpiksjeje gjaku.
“Këto janë gjëra që kombinohen së bashku, duke rezultuar në një atak në zemër disa orë më vonë”, tha Kopecky.
Çfarë duhet bërë për të zvogëluar rrezikun
Shijoni një vakt të bollshëm, por vendosni edhe ushqime të shëndetshme në pjatën tuaj .
Idealisht, rreth 50 përqind e pjatës suaj duhet të jetë e mbushur me fruta dhe perime, 25 përqind me proteina dhe 25 përqind me karbohidrate, tha Kulkarni. Pra, merrni në konsideratë të filloni me një sallatë dhe më pas të shtoni ushqime të plota e të freskëta, si gjeldeti me një sasi të vogël mbushjeje, fasule dhe patate të ëmbla.
Ha ngadalë
Duhen deri në 20 minuta pasi stomaku juaj të jetë plot, që truri juaj të marrë sinjalin që është ngopur, pra mund të hani shumë kur hani shpejt. Merrni kohën tuaj dhe përdoreni kohën e vaktit si një ngjarje shoqërore për t’u takuar me familjen dhe miqtë.
Kufizoni alkoolin
Pirja e alkoolit mund të stimulojë oreksin tuaj dhe të pengojë vetëkontrollin, duke çuar në ngrënie të tepërt.
Ndalo së ngrëni kur të ndiheni të ngopur
Pasi të jeni ngopur, shmangni marrjen e një porcioni të dytë.
Bëni një shëtitje pas darkës
Ecja mund të ndihmojë në uljen e triglicerideve, një formë yndyre në qarkullimin e gjakut, dhe të rregullojë presionin e gjakut, tha Kopecky. Gjithashtu mund të ulë sheqerin në gjak.
