Hamasi po planifikon të integrojë rreth 10,000 oficerë policie në qeverinë e re të Gazës, e mbështetur nga SHBA-të, në një përpjekje për t’u bashkuar me Komitetin Kombëtar për Qeverisje (NCAG) të rajonit. Ky hap vjen ndërsa procesi i çarmatimit të grupit mbetet ende i bllokuar. Në një letër drejtuar stafit të tij, Hamasi i ka ftuar 40,000 punonjës dhe anëtarë të forcave të sigurisë të bashkëpunojnë me NCAG, duke garantuar se po ndërmerren të gjitha hapat për integrimin e tyre në qeverinë e re. Sipas burimeve, pjesa më e madhe e policëve tashmë ka filluar të kryejë detyrat e saj në Gaza, ndërsa grupi përpiqet të rivendosë pushtetin në zonën që kontrollon.

Megjithatë, Izraeli ka hedhur poshtë kategorikisht çdo përfshirje të Hamasit në administratën e ardhshme të Gazës, duke ngritur pikëpyetje për pranimin e punonjësve politikë dhe policorë në NCAG.

Procesi i çarmatimit mbetet një sfidë kryesore. Administrata Trump kërkon që Hamasi të dorëzojë armët e rënda dhe t’i regjistrojë armët personale, duke i hequr ato sektorialisht, ndërsa policia e NCAG do të sigurojë rendin dhe sigurinë personale. Zyrtarët amerikanë kanë paralajmëruar se luftëtarëve të Hamasit mund t’u ofrohet një formë amnistie, por grupi ende mban raketa dhe mijëra armë të lehta.

Hamasi ka shprehur gatishmërinë për të diskutuar çarmatimin me fraksione të tjera palestineze dhe ndërmjetës, duke përfshirë Izraelin, Katarin, Egjiptin dhe Turqinë, dhe ka sugjeruar mundësinë e një armëpushimi afatgjatë prej rreth pesë vjetësh. Megjithatë, udhëheqësit e Hamasit theksojnë se prioritet mbetet nisja e një negocimi serioz politik për shtetësinë palestineze, me armët dhe luftëtarët nën autoritetin e Shtetit të Palestinës.