Irani po rindërton një pjesë të konsiderueshme të aftësive të tij ushtarake që u goditën nga sulmet amerikane dhe izraelite më shpejt sesa kishin vlerësuar fillimisht agjencitë e inteligjencës amerikane , sipas një raporti zbulues nga CNN . Teherani thuhet se ka rinisur tashmë prodhimin e disa dronëve gjatë armëpushimit gjashtë-javor që filloi në fillim të prillit, ndërsa vlerësimet e SHBA-së sugjerojnë se disa aftësi operacionale mund të rikthehen brenda gjashtë muajsh. Sipas katër burimeve të cituara nga CNN, agjencitë e inteligjencës amerikane vlerësojnë se makineria ushtarake e Iranit po rikuperohet dukshëm më shpejt se sa pritej, gjë që ngre shqetësime në lidhje me kërcënimin që Teherani ende paraqet për Izraelin dhe aleatët e SHBA-së në rajon. Dy burime të njohura me vlerësimet e SHBA-së thanë se Irani tashmë ka rinisur një pjesë të prodhimit të dronëve, pavarësisht dëmeve të rënda që pësoi gjatë bombardimeve SHBA-Izrael.

Një zyrtar amerikan i tha CNN se aftësitë iraniane po rikthehen më shpejt se edhe vlerësimet më optimiste të inteligjencës.

“Iranianët i kanë tejkaluar të gjitha afatet kohore që komuniteti i inteligjencës kishte vendosur për rindërtim”, tha ai.

Sipas disa vlerësimeve amerikane, Irani mund ta rikthejë plotësisht aftësinë e tij operative për sulme me dronë brenda gjashtë muajsh.

Të njëjtat burime vërejnë se, në rast të rifillimit të armiqësive, Teherani mund të përforcojë prodhimin e tij të raketave, i cili tani është në rënie, me sulme të shtuara me dronë kundër Izraelit dhe shteteve të Gjirit.

Raporti vjen ndërsa Donald Trump vazhdon të kërcënojë publikisht se do të rifillojë operacionet ushtarake kundër Iranit nëse nuk arrihet një marrëveshje për t’i dhënë fund luftës.

Presidenti amerikan tha të martën se ishte “një orë” larg urdhërimit të një fushate të re bombardimi.

Agjencitë e inteligjencës amerikane vlerësojnë se Teherani ende ka aftësi të konsiderueshme në raketat balistike, dronët dhe sistemet kundërajrore, pavarësisht dëmeve që pësoi.

Një nga burimet e cituara nga CNN tha se rimëkëmbja më e shpejtë se sa pritej e Iranit ishte për shkak të një kombinimi faktorësh, duke përfshirë mbështetjen nga Rusia dhe Kina.

Dy burime me njohuri për vlerësimin e SHBA-së thanë se Kina vazhdoi të furnizonte Iranin me komponentë që mund të përdoren për të ndërtuar raketa gjatë konfliktit, megjithëse ky aktivitet duket se është kufizuar nga embargoja e SHBA-së.

Kryeministri izraelit Benjamin Netanyahu i tha CBS se Kina po i furnizonte Iranit “komponentë për ndërtimin e raketave”, pa dhënë detaje të mëtejshme.

Ministria e Jashtme e Kinës i hodhi poshtë akuzat. Zëdhënësi i ministrisë Guo Jiakun tha se akuzat “nuk bazoheshin në fakte”.

Një vlerësim i mëparshëm i inteligjencës amerikane kishte vlerësuar se rreth gjysma e raketahedhësve të Iranit kishin mbijetuar sulmet e SHBA-së.

Një raport më i fundit e vendos këtë shifër në dy të tretat, pjesërisht sepse periudha e armëpushimit i dha Iranit kohë për të rikuperuar raketathedhëse që ishin varrosur nga sulmet e mëparshme, por që nuk ishin shkatërruar.

Inteligjenca amerikane vlerëson gjithashtu se rreth 50 përqind e aftësive të dronëve të Iranit mbeten funksionale, ndërsa një pjesë e madhe e raketave të tij të mbrojtjes bregdetare nuk janë shkatërruar.

Këto raketa shihen si një mjet kritik për Teheranin për të ushtruar presion mbi anijet në Ngushticën e Hormuzit.

Raporti thekson gjithashtu ndryshimin në vlerësimet midis zyrtarëve ushtarakë dhe agjencive të inteligjencës amerikane.

Komandanti i CENTCOM-it, Admirali Brad Cooper, i tha Komitetit të Shërbimeve të Armatosura të Dhomës së Përfaqësuesve të martën se Operacioni Epic Fury kishte shkatërruar 90% të bazës industriale të mbrojtjes së Iranit.

“Operacioni Epic Fury degradoi ndjeshëm raketat balistike dhe dronët e Iranit, ndërsa shkatërroi 90% të bazës së tij industriale të mbrojtjes, duke siguruar që Irani nuk do të jetë në gjendje të rindërtohet për vite me radhë”, tha ai.

Megjithatë, dy burime të njohura me raportet e inteligjencës amerikane i thanë CNN se këto vlerësime nuk janë në përputhje me të dhënat e disponueshme.

Një nga burimet vuri në dukje se dëmtimi i bazës industriale të mbrojtjes së Iranit mund ta ketë vonuar rindërtimin e saj vetëm për disa muaj në vend të viteve, ndërsa një pjesë e infrastrukturës ushtarake mbetet funksionale.