Kreu i PD, Lulzim Basha është drejtuar me një mesazh ngushëllimi familjes së arkitektit të njohur Hajdar Kovaçi i cil ka qenë dhe pjesë e Partisë Demokratike.

Basha thotë se ai në të gjitha detyrat që shërbeu kujtohet me nderim e respekt, si arkitekt i Bajram Currit, si themelues i arkitekturës moderne apo edhe si përfaqësues për dy mandate nën siglën e PD në Këshillin Bashkiak të Durrësit.

Po ashtu Basha thotë se Hajdar Kovaçi do të mbetet gjatë në kujtesën e atyre që patën fatin ta njohin.

STATUSI NGA LULZIM BASHA

Me hidhërim të thellë mësova lajmin e ndarjes para kohe nga jeta të ing. Hajdar Kovaçit i cili humbi jetën pas një beteje disa ditore me koronavirusin në spital. Në emrin tim dhe në emër të Partisë Demokratike ju shpreh ngushëllimet më të ndjera bashkëshortës së tij znj. Magdalena, djalit të tij Admirit, të afërmve dhe miqve të shumtë të tij dhe mbarë qytetarëve të Durrësit.

Arkitekti Hajdar Kovaçi ky personalitet i respektuar dhe intelektual i nderuar gëzonte respekt të thellë nga kolegët, intelektualët dhe qytetarët. Në vitin 1972 ai u emërua arkitekt në qytetin e Bajram Currit ku edhe sot bashkëkohësit e kujtojnë me nderim e respekt për punën e tij në ndërtimin e qytetit verior si për përgjegjësi të lartë profesionale, kulturë dhe intelekt.

Pjesën tjetër të jetës profesionale dhe familjare e vazhdoi në qytetin e Durrësit, për të cilin dha gjithçka, kontribut që iu shpërblye me mirënjohjen dhe vlerësimin e gjithë qytetarëve durrsakë. Ai mbahet mend si themelues i arkitekturës moderne kur në fillim të viteve ’90 themeloi studion e parë arkitekturore në qytetin bregdetar.

Hajdar Kovaçi është një nga aktivistët më të njohur të Partisë Demokratike në Durrës. Ai ka kandiduar për deputet nën siglën e PD në vitin 2001 dhe ka përfaqësuar për dy mandate qytetarët në Këshillin Bashkiak të Durrësit. Në të gjitha detyrat e tij ai shërbeu me integritet, dhe ishte model i qytetarit familjar, i intelektualit të angazhuar për interesat e komunitetit dhe i profesionistit të talentuar.

Dar Kovaçi do të mbetet përherë në kujtesën e kujtdo që pati fatin ta njohë dhe në mirënjohjen e të gjithë durrsakëve për të cilët dha aq shumë. U prehtë në paqe!

(BalkanWeb)