Drejtoresha e Qendrës Kombëtare së Librit dhe Leximit (QKLL), Alda Bardhyli, në një intervistë për emisionin “Kjo Javë” në News24, ka komentuar shkarkimin nga juria të shkrimtarit Rudolf Marku, për çmimin “Poeti Laureat”.

Ajo u shpreh se shkrimtari Marku shkeli rregullin universal, atë të konfidencialitetit. Ndër të tjera ajo shprehu keqardhjen se si retorika e shkrimtarit shkoi në një gjuhë gati fyese, ndërsa shtoi se debatet duhet të sjellin progres dhe jo regres.

“Ky ishte një debat jo i denjë. Për vetë titullin, kurorë që mbante, nuk i shkonte. Do doja që debati që ai do mbante të përçonte nivel tjetër debati. Retorika kërkonte të dëmtonte procesin, të anatemonte punën e jurisë. Jo vetëm unë si Alda që jam njeri që jetoj me kulturë, edhe në mënyrë institucionale nuk mund të bëhesha pjesë e debatit. Ky proces është shumë i rëndësishëm për qendrën Kombëtare të Librit. Ne vendosëm të përgjigjeshim në mënyrë institucionale. Ai shkeli rregullin universal që është konfidencialiteti. Shpreh keqardhjen se si retorika e tij shkoi në një gjuhë gati fyese, ne kemi nevojë për debate që sjellin progres dhe jo regres.”, u shpreh Bardhyli.

(BalkanWeb)