Kancelari gjerman Olaf Scholz dhe lideri i opozitës Friedrich Merz u përballën në një debat përfundimtar në televizionin gjerman të mërkurën përpara zgjedhjeve të dielën e ardhshme.

Gjatë debatit kandidatët u ndalën te migracioni, ekonomia dhe siguria.

Sondazhet parazgjedhore e kanë vendosur bllokun Union të qendrës së djathtë të Merzit në krye, me socialdemokratët e Scholz-it dhe të Gjelbrit e Robert Habeck-ut më mbrapa.

Scholz ishte luftarak dhe deklaroi se ai ende besonte se do t’i fitonte zgjedhjet këtë të dielë, duke besuar te votuesit e pavendosur që mund të marrin vendimin e tyre vetëm në kabinën e votimit.

“Disa njerëz do të shkojnë në zgjedhje, në qendrën e votimit dhe vetëm atëherë do të vendosin për kë dhe cilën parti të votojnë. Dhe besoj se në fund, shumë do të votojnë për SPD-në dhe do të më japin një mandat të ri për të udhëhequr,” tha ai.

Merz u përgjigj duke thënë se “asnjë mrekulli nuk do të ndodhë gjatë katër ditëve të ardhshme” për të shpëtuar rivalin e tij nga humbja.

“Detyra juaj si kancelar duhet të përfundojë të dielën”, shtoi ai.

Në fushatën zgjedhore, Merz e ka bërë frenimin e migracionit të parregullt një çështje qendrore, duke kërkuar një qasje më kufizuese, veçanërisht që nga një sulm vdekjeprurës me thikë kohët e fundit nga një azilkërkues i refuzuar.

Scholz gjithashtu akuzoi Merz se kishte bërë kauzë të përbashkët me AfD, një aludim për mocionin për ndryshimin e azilit. Merz e kundërshtoi këtë dhe theksoi se CDU/CSU nuk po punon me AfD.

Kur bëhet fjalë për migracionin, Merz tha se qeveria e semaforëve është përgjegjëse për gjendjen aktuale të punëve. Ai dëshiron të heqë të ashtuquajturin status të toleruar dhe paralajmëron për 500 kërcënime të njohura zyrtarisht, duke thënë se ato janë “bomba me sahat”. Scholz shpjegon se policia duhet të ketë më shumë liri me ligjet e reja.

Merz theksoi atë që është më e rëndësishme për të dhe partinë e tij: migrimin dhe kthesën ekonomike. Këto probleme duhet të zgjidhen me çdo kusht, përndryshe, tha ai, Gjermania do të rrëshqasë në populizëm të djathtë pas disa vitesh.

Për sa i përket ekonomisë, Scholz premton të investojë në infrastrukturë dhe të krijojë një bonus “Made in Germany” për të nxitur investimet në Gjermani. Merz, nga ana tjetër, dëshiron të ulë çmimet e energjisë së pari, me ndihmën e tarifave më të ulëta të rrjetit dhe taksave të energjisë.

Merz dhe Scholz bien dakord për tatimin mbi vlerën e shtuar, i cili nuk duhet të rritet më. Sakaq, Scholz akuzon Merzin se po ndjek një politikë tatimore nga e cila përfitojnë vetëm të pasurit.