Një delegacion i profilit të lartë të Koresë së Veriut ka zhvilluar një vizitë të rrallë në Iran, ka raportuar agjencia shtetërore e lajmeve KCNA. Hera e fundit që zyrtarët nga Pheniani bënë një udhëtim të shpallur publikisht në Teheran ishte në vitin 2019.

Një delegacion i kryesuar nga ministri i Koresë së Veriut për marrëdhëniet e jashtme ekonomike, Yun Jong Ho, u nis për në Iran të martën, sipas agjencisë. KCNA nuk zbuloi detaje të mëtejshme rreth vizitës.

Në shkurt, udhëheqësi i Koresë së Veriut Kim Jong-un i dërgoi një mesazh urimi presidentit iranian Ebrahim Raisi për 45 vjetorin e Revolucionit Islamik. Kim shprehu besimin se “marrëdhëniet tradicionale të miqësisë dhe bashkëpunimit mes dy vendeve tona të krijuara në rrugën e luftës së përbashkët kundër imperializmit do të zgjerohen dhe zhvillohen në fusha të ndryshme”.

Zëdhënësi i Departamentit të Shtetit të SHBA, Matthew Miller tha të martën e kaluar se Uashingtoni është “tepër i shqetësuar” për bashkëpunimin e dyshuar midis Teheranit dhe Phenianit në zhvillimin e raketave bërthamore dhe balistike. Të dy vendet mbeten nën sanksione të ashpra ndërkombëtare për programet e tyre të armëve.