Policia italiane ka arrestuar një shtetas shqiptar. 37-vjeçari, banues në Cassano d’Adda, akuzohet për një tentativë grabitjeje dhe për dhunë ndaj efektivëve të rendit.
Ngjarja daton në mbrëmjen e 12 tetorit, kur ai, së bashku me një bashkëpunëtor, tentoi të hynte me forcë në banesën e një 85-vjeçari në Arzago d’Adda. Dy karabinierë, jashtë shërbimit dhe në shoqërinë e familjeve të tyre, i vunë re dhe ndërhynë menjëherë.
Mes tyre dhe autorëve shpërtheu një përleshje fizike, gjatë së cilës efektivët pësuan lëndime, por arritën të neutralizonin njërin prej autorëve, një 47-vjeçar shqiptar, gjithashtu banor i Cassano d’Adda. Ndërkohë, bashkëpunëtori tjetër arriti të largohej nga vendngjarja.
Falë pamjeve të kamerave të sigurisë dhe hetimeve të mëtejshme, Carabinieri arritën të identifikonin dhe gjurmonin 37-vjeçarin, i cili ishte shpallur në kërkim nga Prokuroria e Bergamo.
Duke qenë se ai ishte në liri me kusht dhe nën mbikëqyrje sociale që prej tetorit 2025, autoritetet kërkuan masë më të ashpër sigurie. Gjykata kompetente lëshoi një urdhër për arrest me burg, i cili u ekzekutua nga karabinierët e Treviglio dhe Pioltello.
I arrestuari u dërgua në burgun San Vittore Prison. Gjatë kontrollit në banesën e tij, policia gjeti bizhuteri ari dhe një armë elektrike (taser) të mbajtur në mënyrë të paligjshme, për të cilat ai do të përballet me akuza të tjera nga Prokuroria e Milan.
