Presidenti francez Emmanuel Macron paralajmëroi sot se Evropa duhet të mbetet e ashpër ndaj Rusisë në mënyrë që të shmangë konfliktet e ardhshme, ndërsa udhëheqësit evropianë përgatiten për takimin e së hënës me Presidentin e SHBA-së Donald Trump në Uashington.

“Duhet të hyjmë në një fazë të re diplomatike… një fazë në të cilën duhet të mbrojmë interesat evropiane”, tha Macron pas një takimi virtual të “Koalicionit të të Gatshmëve”, një grup aleatësh kryesorë evropianë të Ukrainës.

Më shumë se gjashtë udhëheqës nga kontinenti do të marrin pjesë në bisedimet në Shtëpinë e Bardhë së bashku me Presidentin ukrainas Volodymyr Zelensky.

«Nesër do të shkojmë për të mbrojtur Ukrainën dhe për të mbrojtur veten tonë», tha ai. «Duhet të na kenë frikë. Që të na kenë frikë, duhet të jemi të fortë».

Udhëheqësi francez tha se Evropa është gati të marrë përgjegjësi në lidhje me garancitë e sigurisë në Ukrainë dhe përsëriti qëndrimin e tij se Kievi nuk mund të detyrohet të heqë dorë nga territori nëpërmjet negociatave me palë të treta që përjashtojnë Ukrainën.

“A mendoj se Presidenti Putin dëshiron paqe? Përgjigja është jo. Nëse doni bindjen time personale, jo. A mendoj se Presidenti Trump dëshiron paqe? Po. Nuk mendoj se Presidenti Putin dëshiron paqe. Mendoj se ai dëshiron që Ukraina të dorëzohet”, tha Macron.

«Nëse jemi të dobët me Rusinë sot, po përgatitemi për konfliktet e së nesërmes», paralajmëroi ai.