LEZHA
Një 46-vjeçar është arrestuar në Kurbin pasi ushtronte dhunë psikologjike e fizike ndaj bashkëshortes dhe djalit të tij.
Po ashtu atij iu gjetën në banesë edhe disa doza kanabisi.
Ndërkohë procedimet kanë vijuar me dy persona të tjerë nga Lezha e Shkodra po për kanabis. Nga ana tjetër dy të tjerë janë proceduar penalisht pasi kishin zaptuar plazhin në Tale të Lezhës me shezlongë e çadra pa lejen e autoriteteve.
NJOFTIMI NGA POLICIA
Kurbin, Lezhë
Ushtroi dhunë fizike ndaj familjarëve dhe mbante lëndë narkotike në banesë, arrestohet në flagrancë nga Policia.
Gjithashtu, procedohen penalisht 4 shtetas të tjerë, për vepra të ndryshme penale.
Nga specialistët e Komisariatit të Policisë Kurbin u bë arrestimi në flagrancë i shtetasit A. Sh., 46 vjeç, banues në Kurbin, pasi në banesë ka ushtruar dhunë psikologjike dhe fizike ndaj bashkëshortes dhe djalit të tij.
Gjithashtu, gjatë kontrollit të ushtruar në banesën e tij u gjetën dhe u sekuestruan në cilësinë e provës materiale doza me lëndë narkotike të dyshuar cannabis sativa.
-Specialistët për Hetimin e Trafiqeve dhe Narkotikëve në Drejtorinë Vendore të Policisë Lezhë proceduan penalisht shtetasit: E. M., banues në Lezhë dhe N. L.,banues në Grudë, Shkodër.
Gjatë kontrollit fizik të ushtruar ndaj tyre, në Shëngjin, Lezhë, shërbimet e Policisë u gjetën dhe sekuestruan në cilësinë e provës materiale doza me lëndë narkotike të dyshuar cannabis sativa.
-Specialistët për Hetimin e Krimeve në Komisariatin e Policisë Lezhë, në vijim të kontrolleve për lirimin e plazheve nga shezlongët e vendosur pa leje, konstatuan 2 subjekte që kishin zaptuar hapësirën publike (plazh), duke vendosur çadra dhe shezlongë pa lejen e autoriteteve përkatëse.
Në vijim të veprimeve u proceduan penalisht shtetasit: N. H., 27 vjeç, banues në Lezhë dhe P. K., 52 vjeç, banues në Kurbin, pasi shërbimet e Policisë konstatuan se në bregdetin e Talës, Lezhë, kishin vendosur çadra dhe shezlongë pa lejen e autoriteteve përkatëse.
Materialet procedurale i kaluan Prokurorisë pranë Gjykatës së Shkallës së Parë Lezhë dhe Prokurorisë pranë Gjykatës së Shkallës së Parë Kurbin, për veprime të mëtejshme.
(BalkanWeb)
