Presidenti i SHBA-së, Donald Trump, dhe kryeministri izraelit, Benjamin Netanyahu, u takuan të martën në mbrëmje për herë të dytë brenda dy ditësh për të diskutuar luftën e vazhdueshme në Gaza.
Takimi erdhi pasi i dërguari i Trumpit në Lindjen e Mesme, Steve Witkoff, sugjeroi që Izraeli dhe Hamasi kishin një çështje të mbetur për të rënë dakord për një marrëveshje armëpushimi 60-ditore.
Netanyahu mbërriti në Shtëpinë e Bardhë pak pas orës 17:00 EST (21:00 GMT) të martën për takimin, i cili nuk ishte i hapur për anëtarët e shtypit.
Më herët të martën, Netanyahu u takua me zëvendëspresidentin JD Vance. Ai u takua gjithashtu me Trump për disa orë gjatë një darke në Shtëpinë e Bardhë të hënën.
Kjo shënon vizitën e tretë shtetërore të Netanyahut në SHBA që nga mandati i dytë i Trump.
Takimi i dy liderëve zgjati rreth dy orë.
Netanyahu u takua gjithashtu me Kryetarin republikan të Dhomës së Përfaqësuesve, Mike Johnson.
Pas atij takimi, kryeministri izraelit tha se nuk besonte se fushata ushtarake e Izraelit në Gaza kishte mbaruar, por se negociatorët “sigurisht që po punojnë” për një armëpushim.
“Ne ende duhet ta përfundojmë punën në Gaza, të lirojmë të gjithë pengjet tona, të eliminojmë dhe shkatërrojmë aftësitë ushtarake dhe qeveritare të Hamasit”, tha Netanyahu.
Witkoff tha më vonë se Izraeli dhe Hamasi po ngushtonin hendekun në çështjet që më parë i pengonin ata të arrinin një marrëveshje dhe se shpresonte që këtë javë të bihej dakord për një armëpushim të përkohshëm 60-ditor.
“Kishim katër çështje dhe tani na mbetet vetëm një”, tha Witkoff për pikat ngërçuese në negociata.
Ai shtoi se draft-marrëveshja do të përfshijë gjithashtu lirimin e 10 pengjeve që janë gjallë dhe trupat e nëntë personave që kanë vdekur.
Përpara takimit të Kryeministrit Izraelit me Trump të hënën, një delegacion nga Katari mbërriti në Shtëpinë e Bardhë dhe foli me zyrtarët për disa orë, raportoi Axios, duke cituar një burim me njohuri për bisedimet.
Trump u tha gazetarëve të hënën në mbrëmje se bisedimet për armëpushim “po shkojnë shumë mirë”. Por Katari, i cili ka luajtur një rol ndërmjetësues në negociata, tha të martën në mëngjes se nevojitet më shumë kohë për negociata.
“Nuk mendoj se mund të jap ndonjë afat kohor për momentin, por mund të them tani se do të na duhet kohë për këtë”, tha zëdhënësi i Ministrisë së Jashtme të Katarit, Majed Al-Ansari.
Përpara se diskutimet të rifillonin të martën, një burim palestinez i njohur me bisedimet i tha BBC-së se ato nuk kanë bërë asnjë përparim.
Raundi i fundit i negociatave midis Hamasit dhe Izraelit filloi të dielën .
Lufta e vazhdueshme në Gaza filloi më 7 tetor 2023 kur Hamasi sulmoi Izraelin, duke vrarë 1,200 njerëz dhe duke marrë 251 pengje, sipas shifrave izraelite. Ofensiva hakmarrëse e Izraelit ka vrarë të paktën 57,500 njerëz në Gaza sipas ministrisë së shëndetësisë të territorit të drejtuar nga Hamasi.
