Presidenti ukrainas Volodymyr Zelenskyy ka shkarkuar të mërkurën Prokurorin e Përgjithshëm Ruslan Kravchenko, pas akuzave se zyra që ai drejtonte kishte ofruar mbështetje për qendra mashtruese telefonatash në këmbim të ryshfeteve.
Kravchenko, i cili në fillim të shtatorit kishte njoftuar se do të largohej nga detyra, i ka mohuar akuzat. Ai deklaroi se ndodhej jashtë vendit në një mision dhe se synonte të informonte partnerët ndërkombëtarë për atë që e cilësoi si situatë problematike brenda strukturave antikorrupsion të Ukrainës.
“Kam ndërmend t’i informoj partnerët tanë ndërkombëtarë rreth situatës reale brenda shërbimeve antikorrupsion, rreth indikacioneve të një përqendrimi të pakontrolluar të ndikimit nga ana e tyre dhe rreziqeve që sjell një praktikë e tillë”, tha Kravchenko në një video të publikuar në Telegram.
Ai njoftoi gjithashtu se kishte ngritur një padi ndaj drejtorit të Byrosë Kombëtare Kundër Korrupsionit të Ukrainës (NABU), Semyon Krivonos, duke e akuzuar për “falsifikim të dokumenteve zyrtare”.
Nga ana tjetër, Zelensky deklaroi se Prokurori i Përgjithshëm “ka vetëm një rrugëdalje: shkarkimin” dhe u bëri thirrje deputetëve që ta miratonin vendimin pa vonesë. Menjëherë më pas, dekreti për shkarkimin e Kravchenkos u publikua në faqen zyrtare të presidencës ukrainase.
Në fillim të shtatorit, NABU kreu hetime në Zyrën e Prokurorit të Përgjithshëm dhe tha se kishte zbuluar një rrjet që merrte ryshfete për të mbrojtur qendra telefonatash të përfshira në mashtrime dhe pastrimin e miliona dollarëve. Sipas hetuesve, paratë e ryshfetit ishin përdorur për blerjen e pasurive të paluajtshme, bizhuterive dhe sendeve të tjera me vlerë.
Korrupsioni mbetet një nga problemet më të mëdha institucionale të Ukrainës, ndërsa lufta kundër tij është bërë një çështje e rëndësishme edhe në marrëdhëniet e Kievit me partnerët perëndimorë dhe procesin e integrimit europian.
Një tjetër përplasje e fortë ndodhi në vitin 2025, kur Zelensky u përpoq të kufizonte pavarësinë e NABU-së dhe ta vendoste atë nën ndikimin e Prokurorit të Përgjithshëm. Vendimi shkaktoi protesta në Ukrainë dhe reagime nga aleatët perëndimorë, duke e detyruar presidentin të tërhiqej.
