KORCE- Ka ndryshuar dëshminë e saj, 24-vjeçarja nga Korça, Vjollca Shkëmbi. Ndonëse herën ajo tha se e donte Urim Qazimajn, i cili u arrestua bashkë me dajën e tij për rrëmbim personi; kësaj herë dëshmon tjetër gjë. Shkëmbi thotë se njerëzit e Urim Qazimajt e kërcënuan, dhe e mbajtën peng për 7 ditë në një banesë në fshatin Pojan të Korçës, nga i ati i njërit prej të arrestuarve.
Sipas policisë pengmarrja ka pasur qëllim përgënjeshtrimin e kallëzimit penal.
Ngjarja
Më 24 dhjetor, policia e Korçës arrestoi dy persona, arrestoi Urim Qazimaj dhe Mersin Myrtollari, të akuzuar për rrëmbimin e 24-vjeçares, dhe shitjen e saj në Maqedoni për 400 euro.
Sipas policisë, dy të arrestuarit Urim Qazimi, 23 vjeç, dhe Mersin Myrtollari, 50 vjeç, në bashkëpunim me njëritjetrin, më 23 dhjetor në fshatin Dobranj, Devoll, kishin rrëmbyer forcërisht, për qëllim fitimi, nga banesa e saj, shtetasen V.Sh, 24 vjeç.
“Nga hetimet e kryera, rezultonte se shtetasi Urim Qazimaj, e ka shitur disa herë 24-vjeçaren, në Maqedoni, në persona të ndryshëm, në këmbim të përfitimit material prej tyre (shumës prej 400 Euro) Urim Qazimaj, kishte qëllim sërish, që të kalonte së bashku me 24-vjeçaren, në shtetin Maqedonas”, thuhet në njoftimin e policisë.
Pas kësaj, Qazim Qazimaj, 52 vjeç, i ati i Urim Qazimajt njërit prej të arrestuarve dyshohet se ka mbajtur peng vajzën për 7 ditë me qëllim që djali i tij të dilte nga burgu, si edhe vajza me inicialet V.SH, të përgënjeshtronte kallëzimin e datës 24.12.2015.
“Arrestimi i Qazim Qazimaj u bë pasi, dyshohet se nga data 27.12.2015 deri në datën 02.01.2015, ka mbajtur në banesën e tij, shtetasen V.SH, 24 vjeç, me qëllim që djali i tij, shtetasi Urim Qazimaj të dilte nga burgu, si edhe shtetasja V.SH, të përgënjeshtronte kallëzimin e datës 24.12.2015″ informon policia e Korçës.
(el.sp/BalkanWeb)
