Kreu i grupit parlamentar të Partisë Demokratike, Gazment Bardhi, reagoi sot në rrjetet sociale duke kritikuar ashpër kryeministrin Edi Rama për qëndrimet e tij ndaj vendimeve të drejtësisë, pas pezullimit të Belinda Ballukut nga detyra si zv/kryeministre dhe ministre.

Bardhi e përshkroi sjelljen e Ramës si një përpjekje për të mbrojtur pushtetin dhe korrupsionin, duke sulmuar drejtësinë sa herë që ajo i afrohet zyrtarëve të qeverisë. Ai përdori metafora duke e krahasuar Ramën me “Don Kishot” që lufton me mullinjtë e erës, por theksoi se problemi nuk janë metaforat, por frika e kryeministrit për veprimet e tij të dyshuara.

Sipas Bardhit, veprimet e Ramës tregojnë se ai nuk e pranon kufirin e ligjit dhe pretendon të jetë garanti i vetëm i drejtësisë, ndërkohë që në një shtet ligjor drejtësinë e garanton Kushtetuta, ndarja e pushteteve dhe barazia para ligjit. Bardhi shtoi se drejtësia nuk ka nevojë për tutorë politikë, por për forcën e ligjit dhe zbatimin e tij të barabartë për të gjithë.

Ai i bëri thirrje Kuvendit të mblidhet të hënën për të shqyrtuar kërkesën e SPAK dhe për të hapur rrugë arrestimit, duke paralajmëruar se çdo vonesë tjetër do të ishte një pengesë e qartë ndaj drejtësisë.

“Ligji nuk negociohet. Ai zbatohet,” përfundoi Bardhi në reagimin e tij, duke theksuar rëndësinë e respektimit të Kushtetutës dhe institucioneve të drejtësisë.