Burime nga Kuvendi bëjnë me dije për BalkanWeb se relatorët e PS dhe PD kanë arritur të përmbyllin draftin e përbashkët të ndryshimeve në Rregulloren e Kuvendit. Pikat kryesore ku u tërhoq PS dhe çfarë u pranua nga PD, në draftin final që do të miratohet nesër në orën 09:00 në mbledhjen e Këshillit për Rregulloren.
Ndërkohë, në draft bie në sy një element interesant. Numri i komisioneve të përhershme parlamentare do të jetë sërish 11, edhe pse rritja e tyre nga 8 që ishin në legjislaturën e kaluar, u dërgua në Kushtetuese nga opozita, në shtator të vitit të kaluar.
Mirëpo, me dakordësinë e shprehur tanimë për rregulloren e re të Parlamentit, duket se PD është tërhequr nga pretendimet e mëparshme të saj dhe komisionet parlamentare do të jenë po ato që fillimisht i kontestoi dhe Gjykata Kushtetuese realisht i dha të drejtë.
1. Pikat ku u tërhoq PS
a) PS u tërhoq nga propozimi që çdo projektligj i kërkuar nga BE të shqyrtohej brenda një jave me procedurë të përshpejtuar.
b) PS u tërhoq nga përgjysmimi i kohës së diskutimit në seancë plenare.
c) PS u tërhoq nga propozimi që institucionet kushtetuese të mos raportonin në seancë plenare, duke pranuar qëndrimin e PD-së se raportimi në Kuvend duhet të bëhet nga çdo institucion që ka detyrim kushtetues për raportim.
d) PS u tërhoq edhe nga propozimi që të gjitha institucionet të raportonin vetëm në Komisionin Xhafaj, duke pranuar qendrimin e PD, që raportimet vjetore të bëhen në komisionet përgjegjëse sipas fushës.
2. Pikat që u pranuan nga PD:
a) U pranua propozimi i PD-së që forcon kontrollin parlamentar përmes ndërhyrjes së Kryetarit të Kuvendit në rastet kur institucionet nuk u përgjigjen kërkesave të deputetëve për informacion. Sipas ndryshimit të pranuar:
– Kryetari i Kuvendit detyrohet t’i kërkojë institucionit përgjigje brenda 5 ditëve nga kalimi i afatit;
– në rast mosreagimi, i kërkohet titullarit të institucionit marrja e masave disiplinore deri në shkarkim.
b) U pranua propozimi i PD-së që kryetarët e komisioneve, kur kërkohet nga pakica parlamentare, të jenë të detyruar të thërrasin mbledhje komisioni ose seanca dëgjimore me titullarë institucionesh brenda dy ditëve nga paraqitja e kërkesës.
c) U pranua propozimi i PD-së që, me kërkesë të një kryetari grupi parlamentar, seanca plenare të ndërpritet në orën 22:00 dhe të rifillojë ditën pasardhëse.
d) U pranua propozimi që masat disiplinore të pezullohen automatikisht nëse ankimohen në Byronë e Kuvendit. Masat disiplinore nuk do llogariten më me ditë pune, por me ditë kalendarike. Sekretariati i Etikës me numër të barabartë anëtarësh.
11 komisionet e përhershme parlamentare
Neni 4
Në nenin 19 bëhen këto ndryshime:
1. Pika 1 ndryshon si më poshtë:
“1. Kuvendi miraton në seancë plenare ngritjen e 11 komisioneve të përhershme, me emërtesat
dhe fushat e përgjegjësisë si më poshtë:
Komisioni për Ekonominë, Punësimin dhe Financat
(Çështjet e politikave ekonomike në përqasjen ndaj tregut të përbashkët europian, Buxhetin e
Shtetit dhe mbikëqyrjen e zbatimit të tij, marrëdhëniet e punësimit, lirisë së lëvizjes së punëtorëve,
financat publike, privatizimet dhe sistemin bankar.)
Komisioni për Çështjet Ligjore dhe Administratën Publike
(Kodet dhe ligjet, duke garantuar përputhshmërinë dhe zbatueshmërinë e tyre me standardin
europian, organizimin e pushtetit gjyqësor dhe raportimin e tij, administratën e pushtetit gjyqësor,
administratën publike, institucionet e pavarura në sistemin e drejtësisë.)
Komisioni për Çështjet e Brendshme dhe të Mbrojtjes
(Çështjet e brendshme, të rendit, organizimin e mbrojtjes dhe sigurisë kombëtare e publike,
organizimin e forcave të armatosura dhe bashkëpunimin ushtarak, çështjet e organizimit dhe
funksionimit të pushtetit vendor, emergjencat civile dhe mbrojtjen nga fatkeqësitë, shërbimet
sekrete.)
Komisioni për Edukimin, Shkencën dhe Sportet
(Çështjet në fushën e arsimit, kërkimit shkencor, inovacionit dhe politikat e zhvillimit të sportit.)
Komisioni për Shëndetësinë dhe Mirëqenien Sociale
(Çështjet lidhur me politikat shëndetësore, sigurimet shoqërore, familjen, gruan dhe çështjet
për mirëqenien sociale.)
Komisioni për Burimet Natyrore, Infrastrukturën dhe Zhvillimin e Qëndrueshëm
(Çështjet në fushën e energjisë, burimeve natyrore dhe biodiversitetit, infrastrukturën,
industrinë dhe telekomunikacionin, rregullimin e territorit, tregtinë dhe mbrojtjen e mjedisit dhe
çështjet për zhvillimin e qëndrueshëm.)
Komisioni për të Drejtat e Njeriut dhe Mjetet e Informimit Publik
(Çështjet në fushën e të drejtave dhe lirive themelore të njeriut, çështjet lidhur me veprimtarinë
e mediave audiovizive dhe informimit, dhe çështjet për garantimin e lirisë së shprehjes.)
Komisioni për Bujqësinë, Ushqimin dhe Zhvillimin Rural
(Çështjet e bujqësisë, blegtorisë dhe peshkimit, çështjet e zhvillimit rural, çështjet e kontrollit
dhe garantimit të sigurisë ushqimore, monitorimin e zbatimit të politikave në fushën e bujqësisë
dhe të sigurisë ushqimore.)
Komisioni për Kulturën, Turizmin dhe Diasporën
(Çështjet e kulturës kombëtare dhe trashëgimisë kulturore, zhvillimin e turizmit të
qëndrueshëm, politikat për ruajtjen e identitetit kulturor, gjuhësor të diasporës dhe të pjesëmarrjes
së saj në proceset politike dhe sociale në vend.)
Komisioni për Europën dhe Punët e Jashtme
(Çështjet e integrimit europian, përafrimi i legjislacionit me legjislacionin e Bashkimit
Europian, mbikëqyrja e zbatimit të angazhimeve që rrjedhin nga Marrëveshja e StabilizimAsociimit, mbikëqyrja e asistencës financiare të Bashkimit Europian për Shqipërinë, monitorimi i
negociatave të anëtarësimit me Bashkimin Europian, politikat e jashtme, marrëdhëniet dhe
bashkëpunimi ndërkombëtar, si dhe zbatimi i marrëveshjeve ndërkombëtare.)
Komisioni për Nismat Qytetare, Bashkëpunimin dhe Mbikëqyrjen Institucionale
(Monitorimi dhe mbikëqyrja e zbatimit të strategjive, rezolutave, vendimeve dhe planeve të
veprimit të Kuvendit; shqyrtimi dhe ndjekja e nismave të qytetarëve dhe peticioneve; realizimi dhe
koordinimi, mbikëqyrja dhe kontrolli i zbatimit të ligjeve nga ekzekutivi, institucionet dhe agjencitë
e pavarura prej tij, përmes koordinimit të procesit parlamentar për kontrollin post-legjislativ
(PLS); koordinimi i dialogut dhe bashkëpunimit ndërinstitucional.)”
2. Pas pikës 3 shtohet pika 4, me këtë përmbajtje:
“4. Kudo në Rregulloren e Kuvendit, emërtesat e komisioneve të përhershme zëvendësohen
sipas emërtesës së komisioneve të përhershme në nenin 19, pika 1, të këtij vendimi.”
