Finalizohet faza e tretë e operacionit policor të koduar “Zonat”, gjatë së cilës është goditur një tjetër rast i furnizimit dhe shpërndarjes së drogave të forta.

Si rezultat i operacionit, janë arrestuar në flagrancë shtetasit Gezim Muhameti dhe Zhuljan Prençi.

Sipas policisë, bazuar në informacionet e siguruara në rrugë operative dhe hetimeve të zhvilluara, shërbimet e Seksionit për Hetimin e Narkotikëve kanë lokalizuar dhe ndaluar automjetin me të cilin po qarkullonin dy të dyshuarit në rrugën “Prokop Mina” në Tiranë.

Gjatë kontrollit të automjetit dhe kontrollit fizik, u gjet dhe u sekuestrua si provë materiale një sasi prej 1 kilogram e 71 gramë lëndë narkotike e dyshuar heroinë.

Dyshohet se shtetasit e arrestuar do ta shpërndanin lëndën narkotike në doza të vogla në zona të ndryshme të kryeqytetit, kryesisht në zonën e Tiranës së Re. Policia bën me dije se vijojnë hetimet në bashkëpunim me Prokurorinë për identifikimin e personave të tjerë të përfshirë në këtë veprimtari kriminale.

NJOFTIMI I POLICISE
Tiranë/Intensifikohen kontrollet dhe goditjet ndaj veprimtarisë kriminale të furnizimit dhe shpërndarjes së lëndëve narkotike.

Finalizohet faza e tretë e operacionit policor të koduar “Zonat”.

Goditet një tjetër rast i furnizimit dhe shpërndarjes së lëndëve narkotike të forta.

Sekuestrohen mbi 1 kg heroinë. Vihen në pranga 2 shtetas, konkretisht Gezim Muhameti dhe Zhuljan Prençi.

Në vijim të operacioneve të njëpasnjëshme për goditjen e veprimtarive kriminale në fushën e narkotikëve dhe parandalimin e shpërndarjes së lëndëve narkotike në kryeqytet, Seksioni për Hetimin e Narkotikëve finalizoi me sukses fazën e tretë të operacionit policor të koduar “Zonat”, duke goditur një tjetër rast të furnizimit dhe shpërndarjes së lëndëve narkotike të forta.

Si rezultat i kësaj faze të operacionit, u arrestuan në flagrancë shtetasit G. M., 51 vjeç, banues në Tiranë, dhe Zh. P., 35 vjeç, banues në Gjirokastër.

Bazuar në informacionet e siguruara në rrugë operative dhe pas një pune hetimore e operacionale të mirëorganizuar, shërbimet e Policisë lokalizuan dhe ndaluan automjetin me të cilin qarkullonin këta shtetas, në rrugën “Prokop Mina”.

Gjatë kontrollit të automjetit dhe kontrollit fizik, shërbimet e Policisë gjetën dhe sekuestruan, në cilësinë e provës materiale, 1 kg e 71 gramë lëndë të dyshuar narkotike të llojit heroinë.

Nga veprimet hetimore dyshohet se këta shtetas do të furnizonin shtetas të tjerë me këtë sasi lënde narkotike, me qëllim shpërndarjen e saj në doza në zona të ndryshme të kryeqytetit, kryesisht në zonën e Tiranës së Re.

Në bashkëpunim me Prokurorinë vijojnë hetimet për dokumentimin e plotë të kësaj veprimtarie kriminale, si dhe për identifikimin dhe kapjen e personave të tjerë të përfshirë.

Gjatë fazave të para dhe të dytë të operacionit “Zonat”, janë sekuestruar mbi 1 kg lëndë narkotike e dyshuar kokainë dhe janë vënë në pranga dy poseduesit e saj.

Materialet procedurale iu referuan Prokurorisë, për veprime të mëtejshme.