Katër persona, përfshirë një fëmijë, humbën jetën pasi një varkë që transportonte emigrantë u fundos në brigjet e një ishulli lindor të Egjeut të martën, tha roja bregdetare e Greqisë.

Një anije patrullimi e rojes bregdetare nxori trupat e dy grave, një burri dhe një vajze nga deti në bregdetin jugor të ishullit Lesbos, tha roja bregdetare, duke shtuar se një anije gjysmë e zhytur u gjet pranë një pjese shkëmbore të bregut aty pranë.

Tridhjetë e katër të mbijetuar arritën vetë në breg dhe u gjetën nga policia. Një operacion kërkim-shpëtimi në tokë dhe det u ndërpre pasi të mbijetuarit u thanë autoriteteve se kishte gjithsej 38 persona në bordin e varkës dhe nuk kishte persona të tjerë të zhdukur.

Nuk ishte menjëherë e qartë se çfarë e kishte shkaktuar fundosjen dhe autoritetet nuk kishin menjëherë detaje të mëtejshme mbi kombësitë e të mbijetuarve ose të viktimave.

Greqia është një nga pikat kryesore të hyrjes në Bashkimin Evropian për njerëzit që ikin nga konflikti dhe varfëria në Lindjen e Mesme, Afrikë dhe Azi. Shumë prej tyre bëjnë udhëtimin e shkurtër, por të rrezikshëm, nga bregu turk në ishujt grekë aty pranë, me barka të fryra ose me barka të tjera të vogla, shpesh të papërshtatshme për lundrim, dhe fundosjet fatale kanë qenë të zakonshme.