Ndërsa udhëheqësit e vendeve të Bashkimit Evropian po diskutonin çështje të rëndësishme në ndërtesën e Këshillit Evropian në Bruksel, fermerët demonstruan në rrugët e kryeqytetit belg dhe këto veprime u shndërruan në trazira.

Fermerë nga vende të ndryshme evropiane u mblodhën në Bruksel për të marrë pjesë në demonstratë.

Protesta u nxit nga pakënaqësia me marrëveshjen që Bashkimi Evropian ka nënshkruar me bllokun tregtar MERCOSUR, i cili bashkon shumicën e vendeve të Amerikës Latine. Udhëheqja e Bashkimit Evropian e sheh këtë marrëveshje si një hap të rëndësishëm drejt zgjerimit të marrëdhënieve tregtare me partnerët e saj globalë dhe hapjes së aksesit në tregjet e vendeve të Amerikës së Jugut (Argjentina, Brazili, Paraguai dhe Uruguai), duke krijuar një zonë të madhe të tregtisë së lirë. Megjithatë, fermerët evropianë e shohin këtë marrëveshje si një kërcënim, pasi kanë frikë nga konkurrenca nga produktet bujqësore të importuara më të lira dhe një ulje e subvencioneve të BE-së.

Ngjarjet më dramatike ndodhën përpara Parlamentit Evropian. Protestuesit hodhën patate drejt policisë, e cila u përgjigj me gaz lotsjellës dhe topa uji. Në pjesë të ndryshme të qytetit, demonstruesit ndezën zjarre dhe drejtuan traktorët drejt Lagjes Evropiane.

Sipas mediave lokale, Presidentja e Komisionit Evropian Ursula von der Leyen dhe Presidenti i Këshillit Evropian Anitoniu Costa u takuan me përfaqësues të lobit agrar që organizonte protestën, por bisedimet nuk patën sukses.

Edhe pse marrëveshja me MERCOSUR-in nuk ishte në rendin e ditës të takimit të sotëm të udhëheqësve të Bashkimit Evropian, udhëheqësit e pakënaqur diskutuan çështjen para se të fillonte takimi, përfshirë Presidentin Francez Emmanuel Macron, Kryeministren Italiane Giorgia Meloni dhe Kryeministrin Polak Donald Tusk.