Debatet mes aktorit fitues të çmimit Oscar, George Clooney, dhe Shtëpisë së Bardhë është intensifikuar, pasi ai kritikoi ashpër deklaratat e presidentit Donald Trump lidhur me Iranin, duke i cilësuar si “krim lufte”.

“Disa njerëz thonë se Donald Trump është mirë. Por nëse dikush thotë se dëshiron të shkatërrojë një qytetërim, ky është një krim lufte,” deklaroi aktori, duke shtuar se dallimet politike nuk justifikojnë retorikë të tillë. Nga ana tjetër, reagimi i Shtëpisë së Bardhë ishte i menjëhershëm dhe i ashpër. Drejtori i komunikimit, Stephen Chung, në një deklaratë për The Independent, ironizoi Clooney-n duke thënë se “i vetmi që kryen krime lufte është George Clooney për filmat e tij të tmerrshëm dhe aktrimin e tij të dobët”.

Në një përgjigje për Deadline, Clooney theksoi se situata globale kërkon seriozitet, jo fyerje personale. Ai iu referua përkufizimeve ligjore të krimeve të luftës sipas Konventës së Gjenocidit dhe Statutit të Romës, duke vënë në pikëpyetje qëndrimin e administratës amerikane. Aktori, një mbështetës i kahershëm i demokratëve, ka qenë shpesh kritik ndaj politikave të Trump. Në vitin 2025, ai tërhoqi vëmendje edhe kur i kërkoi publikisht ish-presidentit Joe Biden të tërhiqej nga gara presidenciale përmes një artikulli në The New York Times.

Megjithatë, Clooney ka pranuar se para presidencës së Trump, marrëdhënia mes tyre ishte më miqësore. “E njihja shumë mirë… Ishte një djalë shumë qesharak. Epo, ishte. E gjitha kjo ndryshoi,” tha ai në një intervistë për Variety. Përplasjet mes Donald Trump dhe figurave të Hollywood-it nuk janë të reja. Trump ka sulmuar shpesh Clooney-n ndër vite, duke e quajtur “aktor të dorës së tretë” dhe “yll filmi të rremë”. Tensionet mes dy figurave duket se nuk po zbuten, ndërsa retorika politike dhe reagimet publike vazhdojnë të ashpërsohen në prag të zhvillimeve të rëndësishme politike në SHBA.