Sekretari i Përgjithshëm i Partisë Demokratike, Flamur Noka, ka reaguar ashpër pas ngjarjes së fundit të agresionit që përfshin televizionin News 24, duke akuzuar kryeministrin Edi Rama për kapjen e pushtetit mediatik dhe frikësimin e gazetarëve.

Noka mbështetet në raportin e fundit të Departamentit Amerikan të Shtetit, ku theksohet se në Shqipëri liria e shtypit po cënohet rëndë. Kjo, përmes presionit politik, kërcënimeve ndaj gazetarëve dhe vetëcensurës së detyruar nga situata e vështirë në të cilën ndodhet media.

Postimi i Sekretarit të Përgjithshëm të PD-së Flamur Noka:

Pushteti mediatik në duart e kryeministrit Ramaduro

Departamenti Amerikan i Shtetit 🇺🇸 pohon se në #Shqipëri liria e shtypit cënohet deri në pikën që gazetarët vetëcensurohen.

#DASH, në raportin vjetor për gjendjen e të drejtave të njeriut, për Shqipërinë shprehet se:

🔻 “Qeveria, partitë politike dhe grupet kriminale kanë përdorur lidhje të drejtpërdrejta me pronarët e medias dhe redaktorët e lartë për të ndikuar në përmbajtjen e raportimit”.

🔻 “Interesat politike dhe ato të biznesit kanë ushtruar presion mbi gazetarët. Disa gazetarë kanë raportuar se kanë marrë mesazhe kërcënuese ose janë bërë objekt i fushatave publike të njollosjes, pas raportimeve mbi korrupsionin apo keqpërdorimet e supozuara të qeverisë”.

🔻 “Në muajin mars, Unioni i Gazetarëve Shqiptarë ka denoncuar publikisht kryeministrin për përdorimin e një gjuhe frikësuese ndaj një gazetari që po hetonte investimet në turizëm në vend”.

🔻 “Presioni politik, korrupsioni dhe mungesa e fondeve kanë kufizuar pavarësinë e mediave të shkruara, ndërsa raportohet se gazetarët kanë ushtruar vetëcensurë”.

🔻 “Mungesa e kontratave të zbatueshme të punës ka ulur pavarësinë e gazetarëve dhe ka kontribuar në njëanshmërinë e raportimit”.