Sulmet ruse me dron kanë dëmtuar një termocentral në Mykolaiv në jug të Ukrainës gjatë natës, duke lënë të paktën 100,000 njerëz pa ngrohje pasi temperaturat bien nën zero.
“Kjo nuk ka asnjë lidhje me veprimet ushtarake dhe situatën në front. Kjo dëshmon edhe një herë se rusët po luftojnë kundër popullit tonë, kundër jetës në Ukrainë,” shkroi Zelensky për sulmet në kanalin e tij Telegram.
Guvernatori i Oblastit të Mykolaivit, Vitaliy Kim raportoi më herët gjatë ditës se sulmi në rajon përfshinte nëntë drone Shahed, me shpërthime dhe rrënoja nga dronët që dëmtuan pesë ndërtesa të larta dhe plagosën një burrë 64-vjeçar.
“Kjo u bë qëllimisht për të lënë njerëzit pa nxehtësi në temperatura nën zero dhe për të krijuar një katastrofë humanitare,”shkroi kryeministri Denys Shmyhal, i cili tha se pak para orës 13:00 të Kievit, 46,000 njerëz ishin ende pa ngrohje.
Ukraina kishte përjetuar kohët e fundit një pushim nga sulmet e vazhdueshme të Rusisë ndaj infrastrukturës civile të energjisë falë një dimri jashtëzakonisht të ngrohtë.
Temperaturat gjatë natës parashikohet të zbresin deri në -9 gradë Celcius në Mykolaiv.
Po atë natë, Rusia lëshoi gjithsej 143 dronë, nga të cilët forcat ajrore të Ukrainës thanë se rrëzuan 95. Dyzet të tjerë dhe dy raketa balistike ruse gjithashtu humbën objektivat e tyre, sipas të dhënave zyrtare.
Aktualisht nuk ka asnjë koment nga ana e Rusisë.
(BalkanWeb)
