Më 24 nëntor 2025, në prag të festimeve të 28 dhe 29 Nëntorit, në Shtëpinë e Shqipërisë në Łódź u organizua aktiviteti kulturor “Albanian Movie Night”, i ideuar dhe i zhvilluar nga Konsulli i Nderit i Shqipërisë në Łódź, Dr. Paweł Michalak, me pjesëmarrjen e Ambasadës së Shqipërisë në Poloni dhe komunitetit shqiptar.
Në qendër të mbrëmjes ishte shfaqja e filmit “Kolonel Bunker”, një bashkë–produksion shqiptaro–polako–francez, me regji të Kujtim Çashkut, ku luan edhe aktorja e njohur polake Anna Nehrebecka. Filmi u shfaq me titra në gjuhën polake, duke e sjellë më pranë publikut temën e tij historike dhe simbolike.
Aktiviteti u nderua nga prania e disa personaliteteve të rëndësishme të filmit:
•Kujtim Çashku – Regjisor
•Filip Bajon – Producent
•Andrzej Krauze – Kompozitor i kolonës zanore
•Jerzy Rudziński – Drejtor fotografie
Të ftuarit ndanë me publikun përvoja nga xhirimet, sfidat krijuese dhe rëndësinë e bashkëpunimeve artistike mes Shqipërisë dhe Polonisë.
Mbrëmja u zhvillua në një atmosferë festive, duke u shndërruar në një urë të vërtetë miqësie dhe bashkëpunimi mes komunitetit shqiptar dhe miqve polakë. Pjesëmarrja e Ambasadës së Shqipërisë i dha aktivitetit një dimension ceremonial dhe institucional.
Një element i veçantë i këtij eventi ishte roli i vazhdueshëm i Dr. Paweł Michalak në promovimin e Shqipërisë në Poloni. Konsulli është bërë një figurë kyçe në forcimin e marrëdhënieve kulturore shqiptaro–polake, duke organizuar rregullisht ngjarje artistike dhe kulturore që prezantojnë vendin tonë dhe trashëgiminë shqiptare para publikut polak.
Në këtë rast të shënuar, Konsulli i Nderit uroi komunitetin shqiptar me këto fjalë:
“Në këto ditë të shenjta të 28 dhe 29 nëntorit, uroj me zemër gjithë komunitetin shqiptar. Pata nderin të organizoj në Shtëpinë e Shqipërisë në Łódź, Poloni, Festivalin e Filmit, një mbrëmje që bashkoi artin, kulturën dhe frymën tonë të përbashkët.
Le të na udhëheqë dhe bashkojë gjithmonë drita e flamurit tonë. Gëzuar Ditën e Flamurit dhe të Pavarësisë!
Me respekt,
Konsulli i Nderit i Shqipërisë në Łódź, Poloni
Dr. Paweł Michalak.”
Ky aktivitet shënon një hap të rëndësishëm në forcimin e prezencës kulturore shqiptare në Poloni, duke krijuar ura të reja bashkëpunimi dhe dialogu artistik për të ardhmen.
