Një nga dronët rusë që hyri në hapësirën ajrore polake ishte një dron “Gerbera” i projektuar nga Kina dhe besohet se ky model përdoret kryesisht si dron karrem në luftën në Ukrainë.

Ato kanë një nënshkrim radari shumë të ngjashëm me dronët e tjerë shkatërrues që përdoren në luftë – siç janë dronët Shahed ose Geran-2, i cili është një kopje ruse e një Shahed – por janë më të lirë për t’u prodhuar.

Gerbera kushton rreth 10% të çmimit të një Geran-2, u shpreh Rick Rickard, drejtor i operacioneve në EODynamics për SkyNews.

“Dronët Gerbera janë përdorur kryesisht si karrem për t’u rrëzuar dhe për të shpërdoruar një burim”, thotë ai.

“Ukraina po përmbytet nga sasia e dronëve që Rusia po vendos dhe një nga mënyrat se si Rusia po e arrin këtë është duke pasur këtë opsion me kosto 10% që nuk ka efekt përfundimtar, por shpërdoron asetet e mbrojtjes ajrore duke i rrëzuar ato.”

Analiza nga Instituti për Shkencë dhe Siguri Ndërkombëtare sugjeron se dronët u shfaqën për herë të parë në fushat e betejës në Ukrainë në korrik të vitit të kaluar.   Mënyra se si përdoren dronët në luftë ka ndryshuar me një ritëm të lartë dhe ka pasur raportime për dronë Gerbera që po përdoren si armë në Ukrainë.