Kreu i PD, Lulzim Basha është pritur nga Kadri Veseli në një prej takimeve të shumta të tij sot në Prishtinë të Kosovës.

Basha ka thënë për Kadri Veselin, i cili tashmë akuzohet nga Prokuroria Speciale e Hagës për krime lufte gjatë luftës në Kosovë se edhe kësaj radhe drejtësia do të triumfojë.

Lideri demokrat shprehet i qartë se Kosova ishte viktima dhe jo agresori, dhe teksa të akuzuarit nga ana e Kosovës janë përgjigjur thirrjeve të drejtësisë, agresori nuk është përgjigjur për krimet, vrasjet, përdhunimet dhe gjenocidin ndaj shqiptarëve të Kosovës.

STATUSI NGA LULZIM BASHA

Pata kënaqësinë të bisedoj gjatë pasdites me Kryetarin e Partisë Demokratike të Kosovës, zotin Kadri Veseli, për zhvillimet në Kosovë, dialogun mes Kosovës dhe Serbisë, por dhe për aktakuzën e ngritur ndaj tij.

Asnjë akuzë ndaj komandantëve apo ushtarëve të UÇK-së, nuk mund ta njollosë luftën për liri dhe pavarësi të Ushtrisë Çlirimtare të Kosovës. Kosova ishte viktima dhe jo agresori. E megjithatë, të gjithë të akuzuarit nga ana e viktimës, i janë përgjigjur thirrjeve të drejtësisë, ndërsa agresori ende nuk është përgjigjur për krimet, vrasjet, përdhunimet dhe genocidin e ushtruar ndaj popullit të Kosovës.

Edhe kësaj here jam i bindur se drejtësia do të triumfojë, dhe Kosova do të vazhdojë të konsolidohet si shtet i pavarur, i zhvilluar dhe i integruar në strukturat euroatlantike.

Sa i përket dialogut mes Kosovës dhe Serbisë, ndamë të njëjtin qëndrim me z.Veseli se dialogu është rruga e duhur për të çuar në procesin e njohjes së ndërsjelltë mes dy vendeve.

Kam bindjen se udhëheqësit politikë dhe institucionalë të Kosovës do të arrijnë me maturinë, guximin dhe pjekurinë e treguar deri më sot, të përballen me sfidat që ka përpara Kosova, qoftë ato që lidhen me dialogun, politikën e brendshme, çështjet ekonomike apo dhe proceset integruese të Kosovës.

(BalkanWeb)