Franca dhe Britania po propozojnë një armëpushim të pjesshëm një-mujor midis Rusisë dhe Ukrainës që nuk do të mbulonte luftimet në tokë, tha presidenti francez Emmanuel Macron për gazetën e përditshme Le Figaro.

Megjithatë, Macron tha se armëpushimi do të mbulonte sulmet ajrore, detare dhe të infrastrukturës energjetike.

“Në rast të një armëpushimi, do të ishte shumë e vështirë të verifikohej se luftimet përgjatë frontit po respektoheshin”, tha Macron për Le Figaro, duke shtuar se vija e frontit ishte e barabartë me distancën midis Parisit dhe Budapestit.

Macron foli me Le Figaro ndërsa fluturoi për në Londër për një takim me liderët evropianë, të thirrur nga kryeministri britanik Keir Starmer për të avancuar përpjekjet në hartimin e një plani paqeje në Ukrainë.

Samiti në Londër erdhi dy ditë pasi takimi i Presidentit ukrainas Volodymyr Zelensky në Shtëpinë e Bardhë me Presidentin e SHBA Donald Trump përfundoi në ashpërsi. Udhëheqësit botërorë i kanë ofruar një mbështetje të fortë udhëheqësit ukrainas dhe premtuan të bëjnë më shumë për të ndihmuar kombin e tij.

Sipas propozimit franko-britanik, trupat tokësore evropiane do të vendosen në Ukrainë vetëm në një fazë të dytë, tha Macron.

“Nuk do të ketë trupa evropiane në tokën ukrainase në javët e ardhshme”, citon Le Figaro të ketë thënë Macron.

“Pyetja është se si e përdorim këtë kohë për të arritur një armëpushim, me negociata që do të zgjasin disa javë dhe më pas, pasi të nënshkruhet paqja, një dislokim trupash”.

Zelensky, i pyetur nëse ishte në dijeni të planit, u tha gazetarëve në Londër: “Unë jam i vetëdijshëm për gjithçka”.

Macron ka thënë se vendi i tij dhe vendet e tjera evropiane duhet të shpenzojnë më shumë për mbrojtjen. Ai tha për Le Figaro se kjo mund të nënkuptojë 3% deri në 3.5% të prodhimit të brendshëm bruto. Komisioni Evropian gjithashtu duhet të jetë më inovativ në financimin e shpenzimeve të mbrojtjes, tha ai.

 

(A.A/BalkanWeb