Presidenti i Ukrainës, Volodymyr Zelensky, zhvilloi një takim të rëndësishëm me nënpresidentin e SHBA-së, J.D. Vance, këtë të shtunë në Romë, në një përpjekje për të tejkaluar tensionet e shkaktuara nga përplasja e tyre e fundit në Shtëpinë e Bardhë më 28 shkurt. Takimi u mbajt në rezidencën e ambasadorit amerikan në Itali dhe zgjati rreth 30 minuta, sipas një burimi ukrainas për AFP.

Takimi u zhvillua në margjinat e një ceremonie historike në Vatikan, ku Papa Leoni XIV u fronëzua si kreu i ri i Kishës Katolike. Zelensky dhe Vance kishin shkëmbyer më herët një shtrëngim formal duarsh në Sheshin e Shën Pjetrit, përpara se të zhvillonin bisedimet e tyre në prani të ministrit të Jashtëm amerikan, Marco Rubio.

Ky takim vjen në një moment kritik për marrëdhëniet SHBA-Ukrainë, me Uashingtonin që po kërkon të qartësojë pozicionin e tij në raport me mbështetjen për Kievin në luftën kundër agresionit rus.

(Balkanweb)