Janë 53 akademikë, anëtarë të Asamblesë së Akademisë së Shkencave që kanë firmosur për projektligjin e propozuar në parlament nga maxhoranca për Akademinë.

Në letrën e tyre drejtuar Kuvendit mbi variantin përfundimtar të projektligjit të ASH-së të paraqitur në Kuvend, 53 akademikët që kanë firmosur shprehen se e gjejnë në parim në përputhje të plotë, madje të përmirësuar nga ana teknike, me projektin e miratuar nga Asambleja.

“Pasi u njohëm me variantin e paraqitur nga deputetët nismëtarë, pranë Kuvendit dhe Komisionit të Edukimit, pajtohemi plotësisht me të dhe e gjejmë në parim në përputhje të plotë, madje të përmirësuar nga ana teknike, me projektin e miratuar nga Asambleja me vendimin e saj nr.50, të datës 08.09.2022, pasi në të pasqyrohen arsyet kryesore se përse u ndërmor ky projektligj, siç është hapja e mëtejshme e studiuesve shqiptarë jashtë vendit etj”, shprehen Akademikët që kanë firmosur.

Anëtarët socialistë të Komisionit për Media dhe Edukim u mblodhën të mërkurën dhe votuan projektligjin e ri për Akademinë e Shkencave, i cili i zgjat mandatin kryetarit aktual Skënder Gjinushi, një ish-politikan.

Sipas këtij projektligji, Asambleja e Akademisë së Shkencave i përcakton vetë rregullat e funksionimit të saj, nëpërmjet Ligjit dhe Statutit të saj. Organet drejtuese të ASHSH i zgjedh Asambleja me votë, jo ligji.

Në një reagim në rrjetet sociale, kryetarja e këtij komisioni, deputetja e PD-së Flutura Açka e konsideroi një akt antiligjor për t’i zgjatur mandatin Skënder Gjinushit.