Negociatori kryesor i Hamasit, Khalil al-Hayya, tha të martën gjatë bisedimeve indirekte me Izraelin në Egjipt se grupi kërkon garanci nga Presidenti i SHBA-së, Donald Trump, dhe vendet e tjera ndërmjetësuese se lufta do të marrë fund përfundimisht.
“Ne nuk i besojmë pushtimit, as për një sekondë”, i tha ai medias shtetërore egjiptiane, Al-Qahera News, duke iu referuar Izraelit.
“Pushtimi izraelit gjatë gjithë historisë nuk i mban premtimet e tij dhe ne e kemi përjetuar dy herë në këtë luftë. Prandaj, ne duam garanci të vërteta”, vazhdoi ai, duke kritikuar Izraelin për shkeljen e dy armëpushimeve në luftën aktuale.
Dita e dytë e negociatave indirekte në vendpushimin Sharm el-Sheikh në Detin e Kuq është përqendruar në një plan të propozuar nga Trump javën e kaluar që synon t’i japë fund luftës.
Kryeministri izraelit Benjamin Netanyahu, i cili akuzohet për kryerjen e gjenocidit në Gaza, ka thënë se lufta do të përfundojë vetëm kur të kthehen të gjithë pengjet dhe Hamasi të çarmatoset.
Zyra e Netanyahut tha të martën se Izraeli ishte “optimist i përmbajtur”, duke i përshkruar bisedimet si negociata teknike mbi një plan që të dyja palët e kishin miratuar tashmë.
Plani ka marrë mbështetje të gjerë ndërkombëtare dhe Trump u tha gazetarëve të hënën se mendonte se kishte një “shans shumë të mirë” për një marrëveshje të qëndrueshme.
Në një shenjë se bisedimet po fitonin vrull, Katari tha se kryeministri dhe diplomati i tij i lartë, Sheikh Mohammed bin Abdul Rahman Al Thani, do të udhëtojë për në Egjipt sot për t’u bashkuar me negociatat. Kreu i Organizatës Kombëtare të Inteligjencës së Turqisë (MIT), Ibrahim Kalın , i dërguari i Trump në Lindjen e Mesme, Steve Witkoff dhe dhëndri i presidentit, Jared Kushner, si dhe këshilltari kryesor i Netanyahut, Ron Dermer, pritet gjithashtu t’i bashkohen bisedimeve atëherë.
Plani parashikon tërheqjen e trupave të Izraelit nga Gaza pasi Hamasi të çarmatoset dhe krijimin e një force ndërkombëtare sigurie. Territori do të vendoset nën qeverisje ndërkombëtare, nën mbikëqyrjen e Trump dhe ish-kryeministrit të Mbretërisë së Bashkuar, Tony Blair.
