TIRANE- Tirana-Partizani nuk është thjesht një ndeshje futbolli, por është sfida që “ndan një qytet”, në të kuq ose bardheblu, një rivalitet i përhershëm jo vetëm në fushë, por edhe jashtë saj. Dy skuadrat “rivale” do të përballen edhe nesër në stadiumin “Selman Stërmasi”, në orën 18:00. E që gjithçka të shkojë mirë Drejtoria Vendore e Policisë Tiranë, ka një plan masash. Për mbarvajtjen e sigurisë dhe rendit në këtë ndeshje, policia njofton se do të ketë bllokime të disa segmenteve rrugore si dhe bllokime të pjesshme të disa segmeteve rrugore (momenti i kalimit të tifozërive).

Segmentet rrugore që do të jenë të bllokuara, nga ora 15:00 – 21:00, janë:

– Rruga përballë Stadiumit “Selman Stërmasi”
– Rruga “Gjin Bue Shpata”, nga kryqëzimi me Rrugën “Emin Duraku” deri tek kryqëzimi me Rrugën “Sulejman Delvina”
– Rruga “Emin Duraku”, nga kryqëzimi me Rrugën “Gjin Bue Shpata” deri tek rruga përball Stadiumit “Selman Stërmasi”
– Njëra korsi e Rrugës “Sulejman Delvina”, nga kryqëzimi me Rrugën “Gjin Bue Shpata” deri tek kryqëzimi me Rrugën përballë Stadiumit “Selman Stërmasi”

Segmentet rrugore ku do të ketë kufizime lëvizje ose bllokime, nga ora 15:00 – 16:00, gjatë kalimit të tifozërive përkatëse të ekipeve, janë:

Tifozëria e ekipit të “Tiranës”:
Nisja nga Sheshi “Skënderbej”, Rruga “Ibrahim Rugova”, Bulevardi “Bajram Curri”, Rruga “Gjin Bue Shpata”, deri tek Stadiumi “Selman Stërmasi”.

Tifozeria e ekipit të “Partizanit”:
Nisja nga Pallati i Sportit “Asllan Rusi”, Sheshi “Karl Topia”, Rruga “Muhamet Gjollesha”, Rruga “Sulejman Delvina”, deri tek Stadiumi “Selman Stërmasi”.

Policia e Tiranës, kërkon mirëkuptimin e përdoruesve të segmenteve të lartë përmëndura duke ju kërkuar evitimin e lëvizjeve me automjete në oraret e lartpërmendura.

(ma.ar/BalkanWeb)