Senatori brazilian Flávio Bolsonaro, i cili humbi zgjedhjet presidenciale të 25 tetorit përballë presidentit aktual Luiz Inácio Lula da Silva, ka deklaruar se autoritetet braziliane i kanë ndaluar largimin nga vendi dhe i kanë kërkuar dorëzimin e pasaportave, vetëm një ditë pas përfundimit të procesit zgjedhor.

Lajmi është bërë i ditur nga vetë Bolsonaro përmes një postimi në rrjetet sociale, ku ai denoncoi ndërhyrjen e Policisë Federale, ndërsa po largohej nga banesa e babait të tij, ish-presidentit Jair Bolsonaro, i cili ndodhet në arrest shtëpiak.

Sipas senatorit, efektivët e Policisë Federale e prisnin jashtë banesës dhe i komunikuan masat që ishin marrë ndaj tij.

“Këtë mëngjes shkova të vizitoja babanë tim, i cili, siç e dini, ndodhet në arrest shtëpiak”, shkroi Flávio Bolsonaro.

“Ndërsa po largohesha, Policia Federale e Lulës ndodhej përpara derës së tij, në mes të rrugës”, shtoi senatori, duke e lidhur ndërhyrjen e autoriteteve me administratën e presidentit brazilian.

Ai bëri të ditur se efektivët i kishin kërkuar dorëzimin e dokumenteve të udhëtimit, duke i komunikuar njëkohësisht ndalimin për të dalë jashtë territorit të Brazilit.

“Më urdhëruan të dorëzoja pasaportat dhe gjithashtu më ndaluan të largohesha nga vendi”, deklaroi Bolsonaro.

Sipas tij, masa është urdhëruar nga gjyqtari Alexandre de Moraes i Gjykatës së Lartë Federale, duke u mbështetur në një deklaratë të bërë më 23 tetor nga vëllai i tij, Eduardo Bolsonaro.

Ky i fundit kishte sugjeruar publikisht që Flávio Bolsonaro të largohej nga Brazili në rast se humbiste zgjedhjet presidenciale.

Megjithatë, senatori e kundërshtoi arsyetimin e vendimit, duke theksuar se nuk kishte deklaruar asnjëherë se synonte të largohej nga vendi pas humbjes elektorale.

Njoftimi vjen në një klimë tensionesh politike në Brazil, pas zgjedhjeve presidenciale ku Lula siguroi një mandat të ri me 51.8% të votave, kundrejt 48.2% të marra nga Flávio Bolsonaro.

Ndërkohë, edhe presidenti amerikan Donald Trump ka ngritur dyshime mbi procesin zgjedhor brazilian, duke deklaruar se votimi dukej si “një tjetër zgjedhje e manipuluar”.

Deri në këtë fazë, informacionet mbi ndalimin e largimit nga Brazili mbështeten në deklaratat publike të Flávio Bolsonaros, ndërsa nuk është paraqitur një konfirmim i pavarur i vendimit gjyqësor.