Hong Kongu ka thënë se nuk do të konfiskojë superjahtin e një oligarku rus që është nën sanksionet perëndimore.

Shefi ekzekutiv John Lee tha se Hong Kongu do të jetë përgjegjës ndaj sanksioneve të Kombeve të Bashkuara, por jo atyre “të njëanshme” të vendosura nga “juridiksionet individuale”.

Varka prej 521 milionë dollarësh i përket Alexei Mordashov, një aleat i presidentit rus Vladimir Putin dhe një prej njerëzve më të pasur të vendit.

Jahti i tij mbërriti në Hong Kong javën e kaluar pasi lundroi nga Rusia.

Por zoti Mordashov nuk besohet të jetë në të. Miliarderi u sanksionua nga SHBA, Britania e Madhe dhe BE pasi Rusia pushtoi Ukrainën në fillim të këtij viti.

Por qeveria e Hong Kongut tha se nuk ishte e detyruar nga ato sanksione. Prej afër një jave, superjahti shumëkatësh Nord ka qenë një pamje e dukshme në portin Victoria të qytetit me flamurin rus të valëvitur në direkun e tij.

“Ne do të respektojmë sanksionet e Kombeve të Bashkuara, ky është sistemi ynë, ky është sundimi ynë i ligjit”, tha zoti Lee, i cili është sanksionuar vetë nga SHBA për rolin e tij në zbatimin e ligjit represiv të sigurisë kombëtare të Hong Kongut.

(BalkanWeb)