Petrit Alkollari, 58-vjeçari që u plagos më 27 korrik në një kantier ndërtimi në Paskuqan, ka ndërruar jetë pas disa ditësh në kujdesin e mjekëve
Lajmi është bërë i ditur nga një familjar i tij për BalkanWeb, i cili tha se Alkollari humbi jetën mbrëmjen e djeshme dhe u varros sot.
Ngjarja që ndodhi 12 ditë më parë, fillimisht u raportua si një aksident pune, ku Alkollari mbeti i lënduar rëndë, ndërsa policia arrestoi inxhinierin e kantierit, 56-vjeçarin Agim Spahiu, për shkelje të rregullave të sigurisë në punë.
Familjari i 58-vjeçarit të ndjerë tregon se Alkollari ka qëndruar për 12 ditë në gjendje kome dhe ka pasur fraktura shumë të rënda në pjesën e kokës.
Sipas tij ai nuk ka pasur shpresa për të mbijetuar që ditën e parë të shtrimit në spital, pasi vetëm 7 orë pasi 58-vjeçari mbërriti në spital është kaluar në intubim dhe reanimacion, ku qëndroi deri në momentin që ndërroi jetë mbrëmjen e kaluar.
Ky zhvillim e bën edhe më të rëndë rastin dhe pritet që hetimet të thellohen për të përcaktuar përgjegjësitë konkrete që çuan në humbjen e jetës së punëtorit.
Në 27 korrik, pas ngjarjes së rëndë, Policia arrestoi inxhinierin e firmës në kantierin e ndërtimit, Agim Spahiu 56 vjeç. Si dhe referuan materialet në Prokurori, ku nisi procedimi në gjendje të lirë për shtetasen E. M., 21 vjeçe, me detyrë inxhiniere ndërtimi.
(BalkanWeb)
