Inteligjenca izraelite u ka thënë Shteteve të Bashkuara se Hamasi ka pasur qasje në më shumë trupa pengjesh sesa pretendon, sipas Axios.

Duke cituar dy zyrtarë izraelitë dhe një zyrtar amerikan, agjencia e lajmeve raporton se Izraeli u ka thënë Shteteve të Bashkuara se Hamasi nuk po bën mjaftueshëm për të rikuperuar trupat e pengjeve të vdekur dhe se marrëveshja për Gazën nuk mund të kalojë në fazën tjetër derisa kjo të ndryshojë.

“Ne nuk e shohim Hamasin të bëjë çmos në lidhje me trupat”, tha një zyrtar izraelit. Zyrtari amerikan i thotë Axios se Uashingtoni beson se Hamasi përfundimisht do t’i kthejë të gjitha trupat, “por do të duhet kohë”. “Ne do të vazhdojmë të punojmë për këtë, por nuk mund të lejojmë që marrëveshja të dështojë”, theksoi zyrtari.

Pas dorëzimit të të dyve të mërkurën në mbrëmje, mbeten edhe 19 të tjerë, raportuan mediat izraelite. Këta janë katër trupa të hënën dhe tre të martën (një i katërt i përkiste një palestinezi) dhe dy dje. Krahu ushtarak i Hamasit tha se kërkohet një përpjekje e madhe duke përdorur pajisje speciale për të gjetur dhe rikuperuar mbetjet e pengjeve të mbetura.

Brigadat Al-Qassam thanë se kishin dorëzuar të gjithë pengjet e gjallë, si dhe mbetjet që kanë gjetur deri më tani, duke shtuar se po vazhdojnë përpjekjet e tyre për të mbyllur çështjen. Izraeli po thotë gjithnjë e më shumë se durimi i tij me taktikat e Hamasit po mbaron. Hamasi e di shumë mirë se ku ndodhen mbetjet e – të paktën disa – pengjeve që nuk janë kthyer, tha një zyrtar izraelit për Jerusalem Post të mërkurën.

Ndërmjetësit kanë paralajmëruar se mund të duhen javë që Hamasi të gjejë trupat e të gjithë pengjeve, duke pasur parasysh shkallën e shkatërrimit në të gjithë Rripin e Gazës. Do të ngrihet një task forcë e përbashkët ndërkombëtare për të gjetur trupat e zhdukur, ndërsa një ekip egjiptian tashmë po vepron në Rrip për të gjetur dhe rikuperuar pengjet e vdekura.