Një Inter i bukur, i mirë vendosur në fushë, i pafat, pasi në fund atë që festojnë janë të kuqtë e Jurgen Klopp. Zikaltërit treguan forcë karakteri në një ndeshje ku pa diskutim meritonin diçka më shumë, por futbolli i tillë është, shpesh ato që vendosin janë detajet. Ekipi i Inzaghi luajti pa komplekse dhe si i barabartë përballë Liverpool, ndeshja mund të merrte një tjetër rrjedhë nëse Calhanoglu nuk do të ndalej tek traversa.
Gjithsesi, ekipi i Klopp nuk hodhi asgjë, përkundrazi, u mbrojtën mirë kur duhej, shfrytëzuan në maksimum të gjithë detajet dhe mbi të gjitha klasin e individëve të tyre. Deri në minutën e 75-të, tifozët zikaltër shpresuan se do t’ia dilnin përballë atyre që shihen si favoritë për të fituar këtë trofe, por në minutën e 75-të, Bobi Firmino me një goditje të bukur me kokë në shtyllën e parë kaloi Liverpool në avantazh.
Ekipi i Inzaghi u trullos dhe në të 83-tën pas një rrëmuje në zonë, Salah përfitoi duke realizuar edhe golin e dytë, një sukses i pastër 0-2 që i jep një bonus shumë të madh në ndeshjen e kthimit.
Kjo humbje e Inter, sigurisht që nuk i ka lënë një shije të mirë mediave italiane: “Inter kafshon duart”, shkruan La Gazzetta dello Sport. “Nga një planet tjetër”, shkruan Corriere. “Mëkat”, thekson Tutttosport në faqen e parë. “San Hero”, shkruajnë mediat britanike, duke bërë lojëra fjalësh, titull shoqëruar me foton e Momo Salah.
(BalkanWeb)
