Zëdhënësi i Ministrisë së Jashtme të Iranit ka pranuar për herë të parë se disa nga instalacionet bërthamore të vendit kanë pësuar dëme serioze pas sulmeve ajrore amerikane. Megjithatë, ai nuk dha detaje specifike mbi shkallën apo vendndodhjen e dëmeve.
Deklarata vjen pak orë pas publikimit të një raporti të shërbimeve amerikane të inteligjencës, i cili sugjeron se ndërhyrja ushtarake nuk ka prekur komponentët thelbësorë të programit bërthamor iranian. Sipas raportit të Pentagonit, rezervat e uraniumit të pasuruar dhe centrifugat mbetën pothuajse të paprekura.
Ky vlerësim bie ndesh me deklaratat e presidentit amerikan Donald Trump, i cili më herët kishte pretenduar se sulmet kishin shkatërruar plotësisht kapacitetet bërthamore të Iranit. Gjatë qëndrimit në Samitin e NATO-s, Trump e cilësoi ndërhyrjen si një “shuarje të rëndësishme” të infrastrukturës bërthamore iraniane dhe hodhi poshtë raportin e inteligjencës, duke e quajtur të pabesueshëm.
Presidenti amerikan gjithashtu ka vijuar kritikat ndaj mediave si CNN dhe New York Times, të cilat i akuzoi për përhapje dezinformatash dhe përpjekje për të zbehur suksesin e operacionit. Kjo përplasje e re për thelbin e dëmeve shënon një tension të shtuar në marrëdhëniet mes Uashingtonit dhe Teheranit, ndërsa debati mbi ndikimin real të sulmeve vazhdon.
(BalkanWeb)
