Gjashtëdhjetë e tre të burgosur të dënuar me vdekje janë ekzekutuar në burgjet e Iranit nga 28 prilli deri më 11 maj, sipas Amnesty International.
Sipas gazetës, 15 nga të ekzekutuarit ishin pjesëmarrës në protestë.
“Autoritetet iraniane treguan shpërfillje të plotë për jetën njerëzore dhe shtuan ekzekutimet për vepra të lidhura me drogën, duke theksuar më tej ndikimin diskriminues të dënimit me vdekje në komunitetet më të margjinalizuara dhe të varfëra të Iranit”, tha në një deklaratë Agnes Callamard, Sekretarja e Përgjithshme e Amnesty-së.
“Në Iran, autoritetet intensifikuan përdorimin e dënimit me vdekje për të ngjallur frikë në popullatë dhe për të forcuar kontrollin e tyre në pushtet, duke kryer ekzekutime në të gjithë vendin. Të paktën 853 persona u ekzekutuan, duke shënuar një rritje prej 48% nga 576 në vitin 2022. Ekzekutimet ndikuan në mënyrë disproporcionale pakicën etnike beluçie të Iranit, e cila përbënte 20% të ekzekutimeve të regjistruara edhe pse ata përbëjnë rreth 5% të popullsisë së Iranit. Të paktën 24 gra dhe të paktën pesë persona që ishin fëmijë u ekzekutuan”, thuhet në raportin e Amnesty International.
“Nga ekzekutimet e regjistruara në Iran, të paktën 545 janë kryer në mënyrë të paligjshme për akte që nuk duhet të rezultojnë me dënim me vdekje sipas ligjit ndërkombëtar, duke përfshirë veprat e lidhura me drogën, grabitjen dhe spiunazhin. Ekzekutimet për veprat penale të lidhura me drogën u rritën dhe përbënin 56% të ekzekutimeve të regjistruara në vitin 2023, një rritje prej 89% nga 255 ekzekutime të regjistruara në vitin 2022”, tha Amnesty International.
Gjithsej 1,153 ekzekutime u bënë në vitin 2023, që nuk përfshin mijëra që besohet se janë kryer në Kinë, duke shënuar një rritje prej më shumë se 30% nga viti 2022. Ishte shifra më e lartë e regjistruar nga Amnesty International që nga viti 2015 kur 1,634 persona dihej se ishin ekzekutuar. Pavarësisht kësaj rritjeje, numri i vendeve që kryen ekzekutime arriti shifrën më të ulët të regjistruar me Amnesty International.
(A.A/BalkanWeb)
